واژۆ
باڵیۆزی ئەمریكا لەعیراق سەردانی پارێزگای ئەنباری كردو هەمو پشتیوانیەكی ولایەتە یەكگرتوەكانی ئەمریكای بۆ پارێزگاری شارەكە دوپاتكردەوە.
ئالینا رۆمانۆسكی باڵیۆزی ئەمریكا لەعیراق سەردانی پارێزگای ئەنباری كردو لەگەڵ فەرحان دلێمی پارێزگاری ئەو شارە كۆبۆوە.
لە پرێس كۆنفرانسێكدا دلێمی رایگەیاند، یەكەمین سەردانی رۆمانۆسكیە بۆ پارێزگاكەیان لە كارنامەكەیدا جگە لە كۆبونەوەی لەگەڵ حكومەتی خۆجێیی سەردانكردنی چەندین پرۆژەیە كە لەلایەن ئەمریكاوە پشتیوانی دەكرێت لەناویاندا پرۆژەكانی وزەو ئاوەدانكردنەوە هەن، هەروەها كۆبونەوەیە لەگەڵ سەرۆك هۆزو كەسایەتیەكانی پارێزگاكە.
لەلایەن خۆشیەوە باڵیۆزی ئەمریكا لەعیراق رایگەیاند: كۆبونەوەی لەگەڵ پارێزگارو دانیشتوانەكەی بۆ چۆنیەتی پێشكەشكردنی پشتیوانییە بە پارێزگاكەو گەلی عیراق بەگشتی.
وتیشی: ئەمریكا پابەندە بەجێبەجێكردنی ئەركەكانی بەرامبەر بە گەلی عیراق لەگەڵیشیدا بەزاندنی چەكدارانی داعش و بونیاتنانی پرۆژەی خزمەتگوزاریی، یەكێكیش لە گرنگترین ئەو كارانەی باڵیۆزەكان ئەنجامیدەدەن وەك نوێنەرایەتی وڵاتەكانیان سەردانكردنی ناوچە جیاوازەكانی ئەو وڵاتانەیە كە ئەركەكانیانی تیادا جێبەجێ دەكەن، ئێمەشش كاتێك لەعیراقین بۆ بەدەستهێنانی ئەو ئامانجە ئەركەكانمان رادەپەڕێنین.
