واژۆ
ئاوات شێخ جەناب وەزیری دارایی و ئابوریی هەرێمی كوردستان دەڵێت، ئەو پارەی ئێستا بەردەستە بەشی موچە ناكات و بەهیوای ئەوەن كێشەی عیراق و توركیا چاك ببێت تاوەكو پارەی نەوتیان بۆبێت بۆ دابەشكردنی موچە.
ئاوات شێخ جەناب لە بەرنامەیەكی تەلەفزیۆنیدا سەبارەت بە موچەی مانگی نیسان وتویەتی، دەیەوێت بە راستی قسە بكات، ئەو پارەیەی بۆ موچە هەیانە 400 ملیار دینارەكە دەتوانن بڵێن ئامادەیە، 70 بۆ 80 ملیار دینارێكی مانگی پێشووش ماوەتەوە، ئەوەندەش بەتەنیا بەشی موچە ناكات.
رونیشكردووەتەوە، لەم ماوەیەدا بە زوویی خوا بكات ئەو كێشەیەی عیراق و توركیا چارەسەربێت و پارەی نەوتیان بۆبێت، چونكە ئەگەر پارەی نەوتیان بۆ نەیەت 500 ملیۆن دۆلاریان كەم دەبێت بۆ موچە، بەڵام لەم دۆخەدا و بەپێی ئەو رێككەوتنەی لەگەڵ عیراق هەیانە و بەپێی یاسای بودجە و هەموو لۆژیكێك، لە هەر دۆخێكدا كە ببێتە هۆی نەناردنی نەوتەكە لە بەرپرسیاریەتی عیراقدایە و دەبێت بۆیان دابین بكات و خەریكن لەسەر ئەوەش كار دەكەن.
هەرچی سەبارەت بە پاشەكەوتی موچەیە، وەزیری دارایی هێمای بۆ ئەوە كردووە، هەر دەبێت وەربگیرێتەوە و چەند كۆن بێت نافەوتێت، ئەگەر وەكو پێشوو بوایە ئەمانەت دوای 10 ساڵ دەبێتەوە بە موڵكی حكومەت و سفر دەبێتەوە، حكومەت هەڵوێستێكی زۆر سەر راستانە و جوامێرانەی هەبوو و ئەمەی كرد بە ماڵ و نەهات خۆی لەو بەرپرسیاریەتییە بدزێتەوە.
