واژۆ
عومەر گوڵپی ئەندامی پەرلەمانی كوردستان پێی وایە، ئەوەی وەزارەتی سامانە سروشتییەكان كردویەتی گرانكردنی بەنزینە و وەزارەتەكە و پاڵاوتگەكان بۆ هەر لیترێك 10 دیناری تر قازانج دەكەن.
عومەر گوڵپی لە تۆڕی كۆمەڵایەتی فەیسبووك نوسیویەتی، ئەمە گرانكردنی بەنزینە یاخود یەكخستنی نرخ؟، بەناوی یەكخستنەوەی نرخی بەنزینی 690 دیناریان نەهێشت و كردیانە 750 دینار! نەوت هی خۆتە و بەنزینخانەش هی خۆت، بۆچی بەو نرخە بە شۆفێری دەفرۆشی؟
رونیشیكردووەتەوە، وەزارەتی سامانە سروشتیەكان لە بەنزینە 800 دینارییەكە تەنها 50 دینار هاتووەتە خوارەوە، بەڵام لە 690 دینارییەكە 60 دیناری گران كردووە، لەو نێوانەدا وەزارەتەكە و پاڵاوگەكان بۆ هەموو لیترێك 10 دینار قازانج دەكەن و هاوڵاتیان زیان، نەوت موڵكی خەڵكی كوردستانە و پاڵاوگەش لە كوردستانە، ئیتر بۆچی بەنزین بە 750 دینار دەدەیتە شۆفێران؟
ئەو پەرلەمانتارە نوسیویشیەتی، شۆفێران بە گشتی و شۆفێرانی تەكسی بەتایبەتی لە دۆخێكی قورسدا كارەكەیان دەكەن، لە نێوان گرانی نرخی بەنزین و خراپی دۆخی ژیانی هاوڵاتیاندا ئەوان سوتاون، نە دەتوانن پارەی زیاتر لە هاوڵاتیان وەرگرن بۆ گواستنەوە، نە بەو نرخە زۆرەی بەنزینیش دەبنە خاوەنی هیچ لە كارەكەیاندا، نەوت و پاڵاوگە لە هەرێم هەیە، پێویستە نرخی بەنزین لە 500 دینار زیاتر نەبێت.
