واژۆ
لەشاری هەولێر بە ئامادەبونی مەسعود بارزانی سەرۆكی پارتی دیموكراتی كوردستان كۆنفرانسی نێودەوڵەتی زانستی جینۆسایدی كوردانی فەیلی لەشاری هەولێر بەڕێوەچوو.
لەو كۆنفرانسەدا مەسعود بارزانی وتارێكی پێشكەشكردو لە بەشێكیدا رایگەیاند: فەیلییەكان كەوتونەتە ژێر مەینەت و كارەساتی زۆر، رژێم بە زۆر ئامراز هەوڵیداوە بۆ ئەوەی لەهەڵوێستە نیشتمانی و نەتەوەییەكانیان دایان بماڵێت و لە نەتەوەكەیان دایانببڕیت، بەڵام سەرجەم ئامرازەكان شكستیانهێنا، بۆیە پەنایان بۆ ئامرازی دڕندانە برد لەنێویشیاندا دورخستنەوەی زۆرەملێ بەو پاساوەی ئەوان بیانین، هەروەها دەست بەسەرداگرتنی موڵك و ماڵی گوازراوەو نەگوازراوە، وێڕای هەموو ئەوانەش ئەو ژمارەیەی كەگومانی تێدا نیە 12 هەزار گەنجەو رەنگە زیاتریش بێت، بەڵام ئەوە ژمارەكەیە كە لێی دڵنیاین تەمەنیان لەنێوان 18 تا 30 ساڵ بەشێوەیەكی دڕندانە پاكتاو كران و تائێستا كەس نازانێت لە كوێ نێژراون.
بارزانی وتیشی: كارەسات و كۆمەڵكوژكردنی فەیلییەكان حەلقەیەكە لەو زنجیرە تاوانەی كە لە دژی گەلی كوردستان ئەنجامدراون، هەمومان ئەوەمان بینی كە ئێزدییەكان بەسەریان هات لە كۆمەڵكوژی كە هەموو پێشبینییەكانی تێپەڕاند، گەلی ئێمە ئەم تاوانانە لەبیر ناكات، بەڵام كە دەرفەتی بۆ هاتۆتە پێشەوە تۆڵەی نەكردۆتەوەو نایكاتەوە لەگەڵ ئەوەشدا ئەو تاوانانە لەبیر ناكات.
