واژۆ
بە تۆمەتی ئەنجامدانی تەقینەوە لە بەغدا و تێكدانی سەقامگیری و ئاسایشی وڵات، دادگای عیراقی سزای لە سێدارەدانی بۆ 5 كەسی تر دەركرد.
ناوەندی راگەیاندنی ئەنجومەنی باڵای دادوەریی لە عیراق لە بەیاننامەیەكدا بڵاویكردووەتەوە، دادگای تاوانەكانی كەرخ سزای لەسێدارەدانی بۆ 3 تاوانبار دەركردووە، كە بەشداربوون لە تەقینەوە لە ناوچەی كازمییە لە بەغدا.
ئەوەش هاتووە، هەروەها هەمان دادگا سزای لەسێدارەدانی بۆ 2 كەسی تر دەركردووە كە بەشداربوون لە تەقینەوەی پشتێنێكی بۆمبڕێژكراو بە سەردانیكەرانی ئیمام حسێن لە بەغدا و بەهۆیەوە ژمارەیەك هاوڵاتی كوژراون و بریندار بوون.
عیراق یەكێكە لەو وڵاتانەی كە تاوەكو ئێستاش تێیدا سزای لەسێدارەدان جێبەجێ دەكرێت و مانگانە ئەو سزایە بۆ ژمارەیەك تۆمەتبار دەردەكرێت، بەتایبەتی ئەندامانی رێكخراوی داعش كە تێوەگلاون لە تەقینەوە و هێرشەكان.
