واژۆ
بەپێی ئامارێكی بەڕێوەبەرایەتی گشتیی ئاو و ئاوەڕۆ لە وەزارەتی شارەوانی و گەشتوگوزار، هەزاران هاووڵاتی بەبڕیاری لێخۆشبونی رێژەی %15ی كرێی ئاو سودمەند بون.
باس لەوەشكراوە، لەچەند هەفتەی رابردودا وەك پاڵپشتی و ئاسانكاریی بۆ هاووڵاتیان و لەسەر داوای وەزارەتی شارەوانی و گەشتوگوزار، لەلایەن ئەنجومەنی وەزیرانی هەرێمی كوردستانەوە رەزامەندی درا لەسەر لێخۆشبونی بەشێكی قەرزی كرێی ئاو و وەزارەتی شارەوانی بڕیاری جێبەجێكردنی لێخۆشبونی %15ی ئەو قەرزەی دا، تائێستا زیاتر لە 11 هەزار هاوبەش سودمەند بون.
بەڕێوەبەرایەتی گشتی ئاو و ئاوەڕۆ بڵاویشیكردۆتەوە، تەنها لەماوەی 20 رۆژدا لە سنوری تەواوی فەرمانگەو بەڕێوەبەرایەتییەكانی ئاو لەشارەكانی هەولێر، سلێمانی، دهۆك، هەڵەبجە، كۆیە، سۆران، زاخۆ، ئاكرێ، كەلار، گەرمیان و راپەڕین لەو لێخۆشبونە سودمەند بون و بە بڕی نزیكەی 396 ملیۆن دینار لێخۆشبون بۆ هاووڵاتیان كراوەو بڕیارەكەش تا 10ی ئایاری 2023 كاری پێ دەكرێت.
