واژۆ
د. بڕیار ڕەشید پەرلەمانتاری فراكسیۆنی یەكێتی لە پەرلەمانی عیراق ئاشكرای كرد، داوایان كردووە لە یاسای بودجەدا بڕە پارەیەك بۆ دانەوەی پاشەكەوتنی موچەی فەرمانبەرانی هەرێمی كوردستان دابین بكرێت.
د. بڕیار ڕەشید بە میدیای حزبەكەی وتووە، بۆ گەڕاندنەوەی پاشەكەوتی موچە بە نوسراو و لە كۆبونەوەی پەرلەماندا داوایانكردووە كە مافێكی موچەخۆرانی هەرێمە و پێویستە بۆیان بگەڕێندرێتەوە.
رونیشیكردووەتەوە، بە جۆرێك كە لە یاسای بودجەدا بڕە پارەیەكیان بۆ تەرخانبكرێت، یاخود حكومەتی هەرێم پابەند بكرێت پاشەكەوتەكە بۆ موچەخۆرانی هەرێم بگەڕێنێتەوە.
ئەو پەرلەمانتارەی یەكێتی باسی لەوەش كردووە، لە رێگای پەرلەمانەوە كار دەكەن كە جارێكی دیكە موچەی فەرمانبەرانی هەرێم وەكو كارتێكی سیاسی و گوشار بەكارنەهێندرێت، وەكو فراكسیۆنی یەكێتی هەموو هەوڵێك دەدەن موچەی فەرمانبەرانی هەرێم بۆ لەمەودوا پارێزراوبێت.
