واژۆ
شارەزایەكی كەشناسی ئاشكرای كرد، شەپۆلێكی خۆڵبارین روو لە ناوچەكانی هەرێمی كوردستان دەكات و چڕییەكەی لە ناوچەكانی كەركوك و هەولێر و سلێمانی و ئیدارەی گەرمیان زیاتر دەبێت.
ئاراس جەبار شارەزای كەشناسی رایگەیاندووە، بەپێی پێشبینییەكان سبەی یەكشەمە ئاسمانی هەرێم بەزۆری نیمچە هەور دەبێت و پلەكانی گەرما بەجێگیری دەمێنێتەوە و لە ئەنجامی نزیكبوونەوەی بارستە هەوایەكی فێنك لەسەر ناوچە سنوریەكانی عیراق و سوریا خێرای با لەكاتەكانی نیوەڕۆ بۆ ئێوارەدا چالاك دەبێت.
ئەوەش هاتووە، خێرایی با دەبێتە هۆی هاتنی شەپۆلێكی خۆڵبارین لە رۆژئاوای عیراقەوە بۆ سەر ناوچەكانمان و چڕی و كاریگەری خۆڵبارینەكە لەسەر ناوچەكانی پارێزگای كەركوك و سەنتەری پارێزگای هەولێر و سلێمانی و ناوچەكانی سنوری ئیدارەی گەرمیان زیاتر دەبێت و لەناوچەكانی دیكەی هەرێم بەگشتی كاریگەری كەم دەبێت، كاریگەری ئەم شەپۆلە خۆڵبارینە تاوەكو بەیانی رۆژی دووشەمە بەردەوامی دەبێت دواتر كۆتای پێدێت.
سەبارەت بە كەشوهەوای رۆژی دووشەممە هاتووە، بەهۆی كاریگەری ئەو بارستە هەوایەوە پلەكانی گەرما 3 تاوەكو 4 پلە نزمبوونەوە بەخۆیەوە دەبینێت و تاوەكو رۆژی چوارشەمە بەردەوامی دەبێت و لەكۆتای هەفتەوە جارێكی دیكە پلەكانی گەرما بەرزدەبنەوە، سەبارەت بەباران بەگشتی كۆتای بە بارانی زۆر و باش هاتووە و ئەگەر هەبێت تەنها ئەوەی ماوە حاڵەتی لاواز و نمە بارانە لەماوەكانی داهاتوودا.
