واژۆ
ئایدن مەعروف وەزیری هەرێم بۆ كاروباری پێكهاتەكان دەڵێت، وەك پێكهاتەكان داوا دەكەن هەڵبژاردنی پەرلەمانی كوردستان لەكاتی خۆیدا ئەنجام بدرێت، داواش دەكەن پرسی پێكهاتەكان تێكەڵ بە كێشە سیاسیەكان نەكرێت.
ئایدن مەعروف لە كۆنگرەیەكی رۆژنامەوانیدا وتی، داوای لە لایەنە سیاسییەكان دەكەن بارودۆخی پێكهاتەكان لەبەرچاو بگرن و تێكەڵی كێشە و گرفتە سیاسییەكانیان نەكەن، ئەوان وەكو پێكهاتەكان هەموو كاتێك لەگەڵ ئەوەدابوون هەڵبژاردنی پەرلەمانی كوردستان لە كات و ساتی خۆیدا بكرێت و بەهیچ شێوەیەك دوانەخرێت.
باسی لەوەش كردووە، هەڵبژاردن گرنگی و رەهەندی نیشتمانی خۆی هەیە، هەر بۆیە پێویستە حزب و لایەنە سیاسییەكان وەكو پرسێكی جددی سەیری بكەن و ئەو پرسە لە كێشە و ناكۆكە سیاسییەكانیان دوربخەنەوە.
ئەو وەزیرە هێمای بۆ ئەوەش كردووە، 11 پەرلەمانتار لەنێو پەرلەمانی كوردستاندا نوێنەرایەتی پێكهاتە جیاوازەكان دەكەن و بەشدارییەكی كارایان لەنێو حكومەتی هەرێمدا هەیە، بۆیە بە پێویستی دەزانێت لایەنەكان بارودۆخیان لەبەرچاو وەربگرن و مافەكانیان نەفەوتێنن.
