واژۆ
وەزیری دەرەوەی ئەمریكا رایگەیاند، رژێمی بەشار ئەسەد شایەنی گەڕانەوەی بێ مەرج نیە بۆ كۆمكاری عەرەبی.
ئەنتۆنی بلینكن وەزیری دەرەوەی ئەمریكاو جەیمس كلێڤەرلی وەزیری دەرەوەی بەریتانیا لە كۆنگرەیەكی رۆژنامەوانی هاوبەشدا رەخنەیان لە دوبارە گەڕانەوەی بەشار ئەسەد بۆ كۆمكاری عەرەبی گرت.
لەوبارەیەوە وەزیری دەرەوەی ئەمریكا رایگەیاندوە، رژێمی بەشار ئەسەد شایەنی گەڕانەوەی بێ مەرج نییە بۆ كۆمكاری عەرەبی و ئاماژەی بەوەشدا كە ئەوان بەڕاشكاوانە ئەو پرسەیان بۆ وڵاتانی عەرەبی رونكردۆتەوە.
بلینكن جەختیكردەوە، ئەمریكا، پەیوەندییەكانی لەگەڵ رژێمی بەشار ئەسەد ئاسایی ناكاتەوە، بەڵام لەلایەكی دیكەوە هەمان ئامانجی لەگەڵ وڵاتانی عەرەبیدا هەیە سەبارەت بەگەڕانەوەی ئاوارەكان، دۆزینەوەی رێگەچارەی سیاسی بۆ قەیرانەكەو گەیاندنی هاوكاری مرۆیی بۆ سورییەكان بەبێ بەربەست.
وتیشی: لەگەڵ وڵاتانی عەرەبی هەمان بۆچونیان هەیە سەبارەت بە شكاندنی هەژمونی ئێران لە سوریاو شكست پێهێنانی یەكجارەكی رێكخراوی داعش.
