واژۆ
وەزارەتی كارەبای حكومەتی هەرێمی دەڵێت، لە ئێستادا نزیكەی 24 كاتژمێر كارەبا بە هاوڵاتیان دەدەن، بەرهەمهێنان زیادی كردووە و بۆ وەرزی هاوینی ئەمساڵ بەراورد بە ساڵی رابردوو دوو كاتژمێر كارەبا زیاتر دەبێت.
ئومێد ئەحمەد وتەبێژی وەزارەتەكە بە ماڵپەڕی فەرمی پارتی وتووە، لە نێوان 20 بۆ 24 كاتژمێر كارەبا بە هاوڵاتیان دەدرێت، لە وەرزەكانی بەهار و پایز خواستی بەكارهێنانی كارەبا دادەبەزێت ئەوەش ئەوەیان پێدەڵێت كە شەبەكەی كارەبای كوردستان دروستە و ئەو كارەبایەی هەیە دەتوانێت بگوازرێتەوە بۆ هەموو هاوبەشەكان.
رونیشیكردووەتەوە، هەروەها باشبوونی دۆخی كارەبا لە ئەمساڵدا تەنها پەیوەندی بە كەشوهەواوە نییە، واتا بەراورد بە ساڵی رابردوو بەپێی ئەو داتایانەی هەیانە، دوو كاتژمێر كارەبایان زیادی كردووە ئەوەش بەرهەمی زیادكردنی كارەبایە لە بەرهەمهێنان و باشكردنی تۆڕی كارەبا و فراوانكردنی تۆڕی دابەشكردن.
وتەبێژی وەزارەتی كارەبا باسی لەوەش كردووە، بۆ هاوینی ئەمساڵ بەراورد بە ساڵی رابردوو دۆخی كارەبا باشتر دەبێت، ساڵی رابردوو بەتێكرا 14 بۆ 15 كاتژمێر كارەبایان داوە بەهاوبەشان، بۆ ئەمساڵیش دوو كاتژمێر زیاتر دەبێت، هەروەها چاكسازییان لە تۆڕەكانی بەرهەمهێنانی كارەبا كردووە، هاوكات دوو تۆڕی نوێی بەرهەمهێنانی كارەبا زیادبوون، لەگەڵ بوونی پێوەری زیرەك و بەشێكی زۆری سەرپێچییەكانیش كۆتای پێهاتووە.
