واژۆ
سەرۆكایەتی شارەوانی سلێمانی ئاشكرای كرد، زەوی بۆ پرۆژەی نیشتەجێبوونی كەمدەرامەتان ئامادە كردووە و تەنها رێكارەكان ماون و وەك باسدەكرێت ئەو زەوییەی تەرخان كراوە بۆ پێدانی زەوی نییە، بەڵكو بۆ پرۆژەكەیە.
سەرۆكایەتی شارەوانی سلێمانی بڵاویكردووەتەوە، لە كۆبوونەوەی لیژنەی باڵای پەسەندكردنی سایت پلانی پڕۆژەكاندا تازوتوێی ژمارەیەك پرۆژە كرا و رێكارەكانی تەواوكردنی چەند پرۆژەیەكی دیكە گفتوگۆی لەبارەوە كرا.
لەو بارەیەوە زەردەشت رەفیق وتەبێژی شارەوانی سلێمانی بە میدیای یەكێتی وتووە، یەكێك لەوانەی گفتوگۆی لەسەر كراوە پرۆژەی نیشتەجێبوونی كەمدەرامەتانە كە زەوییەكەی بۆ ئامادەكراوە، تەنها تەواوكردنی رێكارە یاسایی و هونەرییەكانی ماوە.
جەختی لەوەش كردووەتەوە، پارچە زەوییەكە بۆ پێدانی زەوی بە كرێنشینان نییە وەك ئەوەی هەندێك لێكدانەوەیان بۆ كردووە، بەڵكو بۆ ئەو پرۆژە نیشتەجێبوونەیە كە بڕیارە تایبەت بە كرێنشینان و كەسانی كەمدەرامەت دروستبكرێت.
