واژۆ
بەوتەی ئەندامێكی پەرلەمانی عیراق، هیچ دەقێك لە پرۆژە یاسای بودجەی گشتی عیراقدا دانەنراوە سەبارەت بە دانانی باج لەسەر كارتی مۆبایل.
سۆران عومەر ئەندامی پەرلەمانی عیراق بڵاویكردووەتەوە، پاش پەیوەندی لەگەڵ وەزیری پەیوەندیەكانی عیراق، وتی كە ئەوان لە پرۆژە یاسای بودجە هیچ دەقێكیان دانەناوە كە باج بخرێتەوە سەر فرۆشتنی كارت.
ئەو پەرلەمانتارە جەختی لەوەش كردووەتەوە، لەگەڵ هاوڕێكانی دژی هەر هەوڵێك دەبن لەیاسای بودجە بیانەوێت باج لەسەر كارتی موبایل دابنێن.
ئەمەش دوای ئەوەدێت، پێشتر كاروان یاروەیس ئەندامی پەرلەمانی عیراق وتبووی، جارێكی دیكە لە پرۆژەیاسای بودجەی گشتیدا باجی سەر كارتی مۆبایل دانراوەتەوە و ئەوانیش رەتیدەكەنەوە.
لە چەند ساڵی رابردوودا حكومەتی عیراق باجی لەسەر كارتی مۆبایل دانا و ئەو باجەش لە هاوڵاتیان وەردەگیرا و ببووە بارگرانی بەسەر شانیانەوە، بەڵام لەماوەی رابردودا لەلایەن محەمەد شیاع سودانی سەرۆك وەزیرانی عیراقەوە لابرا و نرخی كارتی مۆبایل ئاسایی بوویەوە.
