واژۆ
بەڕێوەبەرایەتی هاتووچۆی سلێمانی بڵاویكردووەتەوە، ئەوەی گوایە لەماوەی 24 كاتژمێردا 385 هەزار سەرپێچی لە رێگەی كامێراكانی هاتووچۆوە تۆمار كراوە راست نییە و ئەو ژمارەیە لەسەرەتای دەستبەكاربوونی كامێراكانەوە تۆمار كراوە، سەرپێچی لە رۆژی 29ی مانگەوە لەسەر شۆفێران هەژمار دەكرێت.
هاتووچۆی سلێمانی لە رونكردنەوەیەكدا ئاماژەی بەوەداوە، شەوی رابردوو ئامارێك بڵاوكراوەیەوە كە گوایە لە ماوەی 24 كاتژمێردا زیاتر لە 385 هەزار سەرپێچی تۆماركراوە، وەك تۆماركردنی سەرپێچییەكان ئامارەكە دروستە بەڵام لەماوەی 24 كاتژمێردا نییە بەڵك و لە سەرەتای دەست بەكاربوونی پڕۆژەكەوە بووە و بەشێوەی تێست بووە.
ئەوەش هاتووە، هیچ كام لەو سەرپێچییانەی كە تۆمار كراون و دەكرێن لەلایەن كامێراكانی چاودێری خێرایی “پۆینت تو پۆینت” لە رێگای “تاسڵوجە – دوكان” هەژمار ناكرێت لەسەر هیچ شۆفێرێك، واتە وەك و سزای دارایی نە لەهیچ شۆفێرێك سەندراوە و نە دەسەندرێت”، چونكە لە قۆناغی تێستدایە تاوەكو رێكەوتی 29/05/2023 كاتژمێر 8ی بەیانی، لە دوای ئەم رێكەوتەوە دەچێتە بواری جێبەجێكردنەوە، ئەو شیكارییانەی لەهەندێك پەیج و ماڵپەڕ كراون دوورە لە راستییەوە.
بە وتەی هاتووچۆی سلێمانی، ئەو هەڵەیەی رویداوە لە پێدانی زانیاری بووە لەلایەن فەرمانبەری بەشی ئاماری كۆمپانیای جێبەجێكاری كامێراكان، واتە ئاماری سەرپێچییەكان بە درێژایی تێستی كامێراكان بووە لە ساڵی پارەوە تاوەكو ئێستا و هەژمار نەكراوە لەسەر هیچ شۆفێرێك، داواكاریشن لە شۆفێران پابەندی ئەو خێراییە بن كە بۆیان دیاریكراوە لەسەر شەقامەكان تاوەكو بە دووربن لە روداوەكانی هاتووچۆ و سزا داراییەكان.
