واژۆ
وتەبێژی فراكسیۆنی یەكێتیی نیشتمانیی كوردستان لە ئەنجومەنی نوێنەرانی عیراق پەیامێكی بڵاوكردەوەو رایگەیاندوە، فراكسیۆنی پارتی دەیانەوێت خەڵكی كوردستان چەواشە بكەن و خەریكی موزایدەی سواون.
سۆزان مەنسور وتەبێژی فراكسیۆنی یەكێتی لە ئەنجومەنی نوێنەرانی عیراق رایگەیاندوە، ماوەی چەند رۆژێكە بەزمانێكی نەشیاو و نەگونجاو لەگەڵ پایەو سەنگی پەرلەمانتاری، فراكسیۆنی پارتی لەئەنجومەنی نوێنەرانی عیراق بەیاننامەو لێدوان بڵاودەكەنەوەو دەیانەوێت خەڵكی كوردستان چەواشە بكەن و خەریكی موزایدەی سواون.
راشیگەیاندوە، لەبەر بەرژەوەندی خەڵكی كوردستان و موراعاتكردنی هەستیاری دۆخەكەو سەرقاڵبونمان بە چەسپاندنی داوا رەواكانی خەڵك لە بودجە، نەمانویست وەڵامبدەینەوەو بچینە ئاستی ئەو زمانە نزم و نەشیاوەی ئەوان، تەنها ئەوەندە دەڵێین هیچ كەس و لایەنێك ناتوانێت لە مەسەلەی بەرگریكردن لە مافەكانی خەڵكی كوردستان لەبەغداو پاراستنی هەرێمی كوردستان و پرسە نەتەوەیی و نیشتمانییەكاندا موزایەدە بەسەر ئێمەدا بكات.
سۆزان مەنسور ئاماژەشیكردوە، هیچ هێزێكی كوردستانی هێندەی ئێمە پەرۆشی یەكڕیزی كوردستانی نەبوە لە بەغدا، ئەوە ئێمە نەبوین لەبەر پۆست و بەرژەوەندی تەسكی حزبی یەكڕیزی بشكێنین.
وتەبێژی فراكسیۆنی یەكێتی رەتیدەكاتەوە قوباد تاڵەبانی جێگری سەرۆك وەزیران پەیوەندی بە هەندێك پەرلەمانتاری عیراقەوە كردبێت و دەڵێت، ئەو قسانە هیچ بنەمایەكیان نیەو هەڵبەستراوە، تەنها پەیوەندی بەنوێنەری یەكێتیەوە لە لیژنەی دارایی كردوەو رێنمایی كردوە كە بۆ چەسپاندنی شایستە داراییەكانی هەرێمی كوردستان هەوڵبدات.
ئاماژەشیكردوە، كاتێك هەرێمی كوردستان لە بەردەم هەڕەشەی گەورەی قەیرانی داراییدا بو، گاڵتەیان بە رێكەوتن لەگەڵ بەغدا دەهات و خەڵكی كوردستان بێ موچە بون، قوباد تاڵەبانی 11 جار سەرۆكایەتی وەفدی دانوستانكاری هەرێمی كردو 256 سەعات كۆبونەوەی لەگەڵ لایەنە عیراقیەكاندا كردو 50 رۆژ لە بەغدا مایەوە تا 200 ملیارەكە دەستەبەر بكات، بۆیە رێگا راستەكە تەبایی و یەكڕیزی كوردستانی راستەقینەیە بۆ چارەسەركردنی كێشەكان، مەترسی راستەقینەش لەسەر هەرێم پەرتەوازەیی و ئاژاوەی سیاسی و گوتاری بوغرایی ئاست نزمی سیاسییە.
