واژۆ
سەرۆكی فراكسیۆنی گۆڕان رایدەگەیەنێت: لەهەرێمی كوردستان و لەسایەی حزبە دەسەڵاتدارەكاندا نە مافی مرۆڤ وەك پێویست پارێزراوە نە ئازادی دەربڕین.
سایتی فەرمی بزوتنەوەی گۆڕان لەسەر زاری گوڵستان سەعید سەرۆكی فراكسیۆنی گۆڕان و ئەندامی لیژنەی مافی مرۆڤ لە پەرلەمانی كوردستان بڵاویكردۆتەوە، پاشەكشە دەبینرێت لە پارێزگاری لە مافی مرۆڤ و ئازادییەكان و مامەڵەی هێزە ئەمنییەكان مامەڵەیەكی تەندروست نیە، زۆرجار لە كەیسە جیاوازەكاندا توندوتیژی بەكاردەهێنرێت، دادگاكانیش لەجیاتی یاسای تایبەتمەند زۆرجار پشت بە یاسای دیكە دەبەستن لە یەكلاكردنەوەی كەیسەكانداو راپۆرت و پێشنیازو بۆچونی خۆمان لەبارەی پێشێلكردنی ئازادییەكان بە سەرۆكایەتی پەرلەمان و لایەنە پەیوەندیدارەكان گەیاندوە.
سەرۆكی فراكسیۆنی گۆڕان جەختیشی كردۆتەوە، نە مافی مرۆڤ وەك پێویست پارێزراوە نە ئازادی دەربڕین و سیاسی و رۆژنامەگەری و لە بەرامبەردا پێشێلكاری زەقی یاسایی و ئەمنی هەیە، حكومەت و لایەنە پەیوەندیدارەكانیش لەبری رەتكردنەوەی راسپاردەی وڵاتان و رێكخراوە نێودەوڵەتیەكان لەبارەی پاراستنی مافی مرۆڤ و ئازادییەكان و مافی هاوڵاتیان و بەرقەراركردنی دیموكراسییەت، دەبێت چارەسەر بدۆزرێتەوەو كرانەوەی زیاتر هەبێت.
وتیشی: لە هەرێمی كوردستان و لە پێشێلكارییەكانی ئەم پرسەدا كێشەمان لە نەبونی یاسا نییە، بەڵكو كێشە لە جێبەجێنەكردنی یاسادا هەیە.
