واژۆ
بەپێی ئامارێك، لە ماوەی 10 ساڵی رابردوودا رێژەی جیابوونەوەی هاوسەران زیادی كردووە و بە نمونە لە پارێزگای سلێمانی 135% زیادی كردووە.
لەو بارەیەوە شۆخان ئەحمەد بەڕێوەبەری رێكخراوی هاریكاریی یاسایی ژنان لە كۆنگرەیەكی رۆژنامەوانیدا راپۆرتی چاودێری جێبەجێكردنی یاسای بەرەنگاربوونەوەی توندوتیژی خێزانی خستەڕوو و وتی، بۆ نمونە پارێزگای سلێمانییان وەرگرتووە و لەساڵی 2021دا چوار هەزار و 108 حاڵەت هەبووە كە كێشەكان گەیشتوون بە دادگاكان لە سنوری سلێمانی، لە ساڵی 2022 دا ژمارەكە بۆ 7 هەزار و 378 بەرزبووەتەوە.
رونیشیكردووەتەوە، لە ساڵی 2021دا چوار هەزار و 727 حاڵەتی جیابوونەوە هەبووە و لە ساڵی 2022 ژمارەكە بۆ پێنج هەزار و 533 حاڵەت بەرزبووەتەوە، هەروەها ئامارەكانی مارەكردنیش زیادیان كردووە و لەساڵی 2021دا 20 هەزار حاڵەت نەبووە و لە ساڵی 2022 ئەوەی هەبووە 21 هەزار حاڵەت بووە.
بەڕێوەبەری رێكخراوی هاریكاریی یاسایی ژنان ئاماژەی بەوەشداوە، ئەگەر سەرنجی ئامارەكان بدەین لە 10 ساڵی رابردوودا رێژەی جیابوونەوە 135% زیادیانكردووە، رێژەی 25% ی ئەوانەی هاوسەرگیری دەكەن جیادەبنەوە.
