واژۆ
ئاژانسی بۆشایی ئاسمانی ئەمریكی ناسا رایگەیاند، دامەزراوەیەكی نوێ نمایش كراوە كە لەڕێگەی مانگی دەستكردەوە داتاكانی زەوی كۆدەكاتەوەو پیشانی دەدات.
باس لەوەكراوە، ناسا میدیاكانی بانگهێشت كردوە بۆ بەشداریكردن لە مەراسیمی كردنەوەی ناوەندی زانیاری زەوی لە بارەگای سەرەكی خۆی لە واشنتۆن، سەنتەرەكە زانیارییەكانی كەشوهەوا و ژینگەی جیهان نمایش دەكات كە لەلایەن زیاتر لە 20 مانگی دەستكردەوە كۆدەكرێنەوە و لەلایەن ناسا و دەزگای بۆشایی ئاسمانی ژاپۆن JAXA و ڕێكخراوەكانی دیكەوە بەڕێوەدەبرێن.
ئاماژەشكراوە، زانیارییەكانی زەوی لەڕێی شاشەیەكەوە كە لە مانگی دەستكردەوە دەگوازرێتەوەو بڕی بارانبارین لە شوێنە جیاوازەكاندا پیشان دەدات، سەردانیكەران دەتوانن بزانن كام شوێن مەترسی زیانی لەسەرە بەهۆی بارانبارینی بەخوڕ و هەروەها نەمانی ساڵانەی سەهۆڵی جەمسەری.
بیل نێڵسن بەڕێوەبەری ناسا رایگەیاندوە، خەڵكی رۆژانە بڕیاردەدەن لەبارەی ئەو بابەتانەی كە پەیوەندییان بە چاككردنەوەی كاریگەرییەكانی گۆڕانی كەشوهەواوە هەیە، پێویستە زیاتر تێگەیشتن بۆ داتاكانی زەوی هەبێت و بەردەست بن و بەكارهێنانیان بۆ هەمووان بێت.
