واژۆ
رێكخراوی تەندروستی جیهانی رایگەیاند، پیسبونی هەوا لەوە خراپترە كە بیرمان لێدەكردەوە، بەڵام هیوایەك هەیە بتوانین چاكی بكەینەوە.
رێكخراوی تەندروستی جیهانی (WHO) باسی لەوەكردوە، كەمی ئاستی پیسبونی هەوا مەترسیدارترە لەوەی پێشتر بیری لێدەكرایەوە، رێكخراوەكە لە یەكەم نوێكردنەوەی جیهانیدا لە ساڵی 2005ەوە هەموو رێنماییەكانی كوالیتی هەوای جیهانیی رێكخستوە بۆئەوەی ئەو زیانانە ئەژمێر بكات كە بەهۆی پیسكەرە نەبینراوەكانەوە بڵاودەبنەوە، ساڵانەش بەركەوتن بە پیسبونی هەوای ناوماڵ و دەرەوە دەبێتە هۆی مردنی پێشوەختە بە 7 ملیۆن كەس و جگە لەوەش دەبێتە هۆی لەدەستدانی ملیۆنان ساڵی تەندروستی تەمەن.
تیدرۆس ئەدهانۆم بەڕێوەبەری گشتی رێكخراوی تەندروستی جیهانی دەڵێت: پیسبونی هەوا مەترسیە بۆ سەر تەندروستی لە هەمو وڵاتان، بەڵام زۆرترین كاریگەری لەسەر خەڵكی وڵاتانی كەم داهات و مامناوەند هەیە.
ئاماژەی بەوەشداوە، رێنماییە نوێیەكان ئامرازێكن بۆ یارمەتیدانی باشتركردنی كوالیتی هەوا كە هەمو ژیان وابەستەیە پێیەوە، داوا لە هەمو وڵاتان و ئەو كەسانەش دەكات كە خەبات دەكەن بۆ پاراستنی ژینگە بەكاریان بهێنن بۆ كەمكردنەوەی ئازارەكان و رزگاركردنی ژیانی خەڵك.
