واژۆ
وەزارەتی دارایی حكومەتی هەرێم جەخت لەوە دەكاتەوە، تاوەكو ئەو دوو مانگەی دیاری كراوە هەركەس قەرزی پێشینەی لایە و نەیگەڕێنێتەوە، لە موچەی كەفیلەكەی دەبڕدرێت.
لەو بارەیەوە شیرین حوسێن بەڕێوەبەری گشتی بانكە پسپۆڕییەكان لە وەزارەتەكە بە میدیای پارتی وتووە، دوو مانگ دیاری كراوە بۆ ئەوەی هاوڵاتیان قەرزی پێشینەكان بگەڕێننەوە، كە لە 19ی حوزەیرانەوە تاوەكو 19ی ئابە.
رونیشیكردووەتەوە، هەركەس قەرزی پێشینەی لایە و لەو ماوەیەدا نەیگەڕێنێتەوە لە 5%ی موچەی كەفیلەكەی دەبڕدرێت، زیاتر لە 4 ترلیۆن دینار وەك قەرز دراوەتە هاوڵاتیان و یەك ترلیۆن و 900 ملیار دینار گەڕێندراوەتەوە.
قەرزەكانی پێشینە لەلایەن بانكەكانی خانوبەرە و پیشەسازی و كشتوكاڵ و نیشتەجێكردنەوە دراون بە هاوڵاتیان، پێشتریش هەركەس قەرزەكەی بگەڕاندایەتەوە 15% داشكاندنی بۆ دەكرا هەروەها لە 10%ی سزای دواكەوتنی گەڕاندنەوەی خۆشدەبوون، بەڵام ئێستا ئەو داشكاندە نەماوە.
