واژۆ
دیمتری میدڤیدیف جێگری سكرتێری ئەنجومەنی ئاسایشی روسیا هۆشداری دەدات لەوەی، زیادبوونی هاوكارییەكانی هاوپەیمانی ناتۆ بۆ ئۆكرانیا، دەبێتە هۆی نزیكبوونەوە لە جەنگی جیهانی سێیەم.
میدڤیدیف لە وتەیەكدا سەبارەت بە كۆبونەوەی لوتكەی ناتۆ كە لە لیتوانیا ئەنجام دەدرێت وتی، ژمارەیەك دەوڵەت بەڵێنیان داوە كە هاوكاری و چەك و پاڵپشتی زیاتری دارایی پێشكەشی ئۆكرانیا بكەن، هاوكارییەكان نابنە رێگر لەبەردەم روسیا بۆ ئەوەی ئامانجەكانی لە ئۆكرانیا بەدەستبهێنێت.
وتوشیەتی، رۆژئاوا شێت بووە و ناتوانێت هیچ شتێكی تر پێشكەش بكات، لە راستیدا ئەوە رێگەیەكی داخراوە، جەنگی جیهانی سێیەم نزیك دەبێتەوە، پرۆسە سەربازییەكەی روسیا بە هەمان ئامانجەكانیەوە بەردەوام دەبێت.
ماوەی زیاتر لە 500 رۆژە پرۆسەی سەربازی روسیا بۆ سەر ئۆكرانیا بەردەوامە و تاوەكو ئێستا ملیۆنان كەس ئاوارەبوون و دەیان هەزار كەس كوژراون، هەروەها زیانی زیاتر لە یەك ترلیۆن دۆلار كەوتووەتەوە.
