واژۆ
دەستەی پاراستن و چاككردنی ژینگە ئاشكرای كرد، ئەمڕۆ چوارشەممە هەڵمەتی خاوێنكردنەوەی سەنتەری شاری هەولێر ئەنجام دراوە، ئەوەش بە ئامانجی هۆشیاری ژینگەیی.
دەستەكە بڵاویكردووەتەوە، لەگەڵ ژمارەیەك كەسایەتی و ژینگەپارێز بە ئامانجی هۆشیاری ژینگەیی و پاك و خاوێنی شەقامەكان، هەڵمەتێكی فراوانی خاوێنكردنەوەیان لە سەنتەری شاری هەولێر ئەنجامدا، هەڵمەتەكە لەبەردەم چایخانەی مەچكۆ دەستیپێكرد بۆ تەواوی شۆستە و شەقامەكان و بازاڕی قەیسەری.
ئەوەش هاتووە، هەڵمەتەكە بریتی بوو لە كۆكردنەوەی زبڵ و پاشماوەكانی بازاڕەكە و هەروەها ژمارەیەكی زۆر لە خۆڵ و خاشاك كۆكرایەوە و بە ئاڕاستەی زبڵخانەی كانی قڕژاڵە گواسترایەوە، لەكۆتایی هەڵمەتەكەشدا كۆنگرەیەكی رۆژنامەوانی ئەنجامدرا و هەر یەك لە جێگری پارێزگاری هەولێر و سەرۆكی شارەوانی هەولێر بە جیا لە بارەی ئەم هەڵمەتەوە بۆ میدیاكان دوان و ئامانجی هەڵمەتەكەیان بەگرنگ وەسف كرد.
دەستەی پاراستنی ژینگە جەختی لەوەش كردووەتەوە، ئەوەش بۆ ئاشنابوون و تێگەیشتنی زیاتری تاكی كۆمەڵگا لە هۆشیاری ژینگەیی و پاراستنی پاك و خاوێنی شاری هەولێر لە هەموو كات و بۆنەیەكدا، پێویستە هاوڵاتیان هاوكار و هەماهەنگ بن و كۆتایی بە نەریتی فڕێدانی پاشماوەكان بێنن.
