واژۆ
لەسەر روداوی كوشتنی كەسێك لە مەیدانی ئاژەڵانی سلێمانی، هێزەكانی پۆلیس ئاشكرایان كرد كە تۆمەتباری روداوەكەیان دەستگیر كردووە.
بەڕێوەبەرایەتی پۆلیسی سلێمانی بڵاویكردووەتەوە، كاتژمێر 9ی بەیانی ئەمڕۆ لەمەیدانی ئاژەڵانی شاری سلێمانی شەڕو دەمەقاڵێ لەنێوان دوو كەسدا دروستبوو، لەئەنجامدا كەسێك بەچەقۆ كوژراو تۆمەتباری روداوەكە هەڵات.
رونیشكراوەتەوە، دوای گەیشتنی هێزەكانی پۆلیس بۆ شوێنی روداوەكە و وەرگرتنی بڕیاری دادوەر، كەشف و هێڵكاری كرا و دوای لێكۆڵینەوەكان توانرا لەلایەن مەفرەزەكانی بنكەی پۆلیسی چوارچرا و نەهێشتنی تاوانی سلێمانییەوە تۆمەتبار بدۆزرێتەوە و دەستگیر بكرێت كە بەنیاز بوو بەرەو شاری هەولێر هەڵبێت.
پۆلیسی سلێمانی جەختی لەوەش كردووەتەوە، لەئێستادا تۆمەتبار بەبڕیاری دادوەر و بەپێی ماددەی 406 لەیاسای سزادانی عیراقی راگیراوەو لێكۆڵینەوە لەگەڵیدا بەردەوامە.
