واژۆ
بڕیارە رۆژی سێشەممە دادگای باڵای فیدراڵی عیراق، لەسەر سكاڵایەك كە دژی پاشەكەوتی موچەی فەرمانبەرانی هەرێمی كوردستان تۆمار كراوە كۆببێتەوە.
بەپێی زانیارییەكان، بەپێی خشتەی كاری دانیشتنەكانی دادگای فیدراڵی عیراق رۆژی سێشەممە 1/8/2023 دادگاكە لەسەر سكاڵایەك لە دژی پاشەكەوتی 21%ی موچەی فەرمانبەرانی هەرێم كۆدەبێتەوە، كە ساڵانی پێشوو لەلایەن حكومەتی هەرێمەوە بڕدرا.
بەپێی زانیارییەكان، سكاڵاكە لەلایەن سروە عەبدولواحید سەرۆكی فراكسیۆنی نەوەی نوێ و شاسوار عەبدولواحید سەرۆكی جوڵانەوەكە و و روناك عەبدولواحید خوشكی سەرۆكی جوڵانەوەكە وەك مامۆستایەك و پەرلەمانتاران باسم خەشان، ڤیان عەبدولعەزیز و وەزیرە ئەحمەد تۆمار كراوە.
لە سكاڵاكەدا داواكراوە، بڕیاری ژمارە 61ی ئەنجومەنی وەزیرانی هەرێم هەڵبوەشێنرێنەوە كە تایبەتە بە لێبڕینی 21%ی موچە و شایستە داراییەكانی موچەخۆران و خانەنشینان، هەروەها لێكەوتەكانی ئەو بڕیارەش هەڵبوەشێنرێنەوە و ئەو بڕە پارەیەی پاشەكەوت كراوە بگەڕێندرێتەوە.
ماوەی چەند ساڵێكە بارودۆخی موچەخۆران باش نییە و سەرەڕای پاشەكەوت چەندین موچەشیان فەوتاوە، ئێستاش كە هیچ كێشەیەكی داهات نەماوە و نرخی نەوت لە ئا‌وستێكی بەرزدایە، تاوەكو ئێستا كە كۆتایی مانگی 7ە، موچەی مانگی 6 دابەش نەكراوە.
