واژۆ
ئاژانسی كۆچی سوید بڕیاریداوە پشكنین بۆ ئیقامەكەی سەلوان مۆمیكا ئەو كەسەی چەند جارێكی سوكایەتی بە قورئانی پیرۆز و ئاڵای عیراق كرد بكاتەوە.
سەرچاوەكانی هەواڵی سوید بڵاویان كردووەتەوە، سەلوان مۆمیكا رێگەپێدانی مانەوەی كاتی لە سوید هەیە و لە ساڵی 2024 كۆتایی دێت، بەڵام دەزگای كۆچی سوید بڕیاریداوە كە پێداچوونەوە بە ئیقامەكەیدا بكات.
رونیشكراوەتەوە، دەزگاكە ئاماژەی بەوەداوە كە بەپێی ئەو زانیاریانەی بەردەستیان كەوتووە بیانوویان هەیە پێداچوونەوە بە ئیقامەكەیدا بكەن بۆ ئەوەی بزانن، ئایا پێویستە ناوبراو لە سوید رەتبكەنەوە یاخودنا.
سوتاندنی قورئانی پیرۆز لە سوید بۆ چەند جارێك و سوتاندنی ئاڵای عیراق لەلایەن كۆچبەرێكی عیراقییەوە، جیهانی ئیسلامی بەتایبەتی عیراقی توڕە كرد و بەهۆی ئەوەشەوە باڵیۆزخانەی سوید لە بەغدا سوتێنرا و سەرجەم پەیوەندییە دبلۆماسییەكان لەگەڵ سوید راگیرا، هەروەها چەندین وڵاتی ئیسلامی ئاڵوگۆڕی بازرگانییان لەگەڵ ئەو وڵاتە راگرت و ئەوەش سویدی خستە بارودۆخێكی نەخوازراوەوە.
