واژۆ
لیژنەی تەندروستی و ژینگەی پەرلەمانی عیراق رایگەیاندوە، بڕی یەك ترلیۆن و 651 ملیار دینار لە یاسای بودجەی گشتی تەرخانكراوە بۆ كڕینی دەرمانی جۆراوجۆر بۆ دەستەبەركردنی لە كۆگاكاندا بۆ ساڵی داهاتوو.
مەجید شنگالی سەرۆكی لیژنەكە باسی لەوەكردوە، هەفتەی رابردو لیژنەی تەندروستی و ژینگەی پەرلەمان میوانداری بەڕێوەبەری گشتی كۆمپانیای گشتی بەبازاڕكردنی دەرمان و پێداویستییە پزیشكییەكانی سەر بە وەزارەتی تەندروستی كرد بە مەبەستی تاوتوێكردنی گرنگترین كێشەو ئاستەنگەكانی بەردەم كارەكانی كۆمپانیاكەو میكانیزمی جێبەجێكردنی گرێبەستەكان بۆ كڕین و ئامادەكردنی دەرمان و پێداویستییە پزیشكییەكانی دیكە.
ئاماژەی بەوەشداوە، ئەو كاتەی ئەندامانی لیژنەی تەندروستی پەرلەمان سەردانی نەخۆشخانەكان دەكەن لە زۆربەیاندا كێشەی كەمی دەرمان هەیە، بڕی یەك ترلیۆن و 651 ملیار دینار بۆ كڕینی دەرمان لە یاسای بودجەی كۆمپانیاكە تەرخانكراوە بۆ دابینكردنی دەرمان بۆ ساڵی 2024.
