واژۆ
پڕكردنەوەی فۆڕمی یەكەكانی نیشتەجێبون لەلایەن هاووڵاتیانی هەرێمی كوردستانەوە بەردەوامەو تائێستا 19 هەزارو 545 خێزان فۆڕمەكەیان پڕ كردوەتەوە.
بەگوێرەی ئامارێكی حكومەتی هەرێمی كوردستان، دابەشبونی پڕكردنەوەی فۆڕمی یەكەكانی نیشتەجێبون لەپارێزگای هەولێر زیاترە لە 8 هەزار خێزان و لەسلێمانی زیاترە لە 6 هەزارو لە دهۆكیش زیاتر لە 2 هەزار خێزانە.
راشگەیەنراوە كە پێشتر دانا عەبدولكەریم وەزیری ئاوەدانكردنەوەو نیشتەجێكردن لە رێورەسمێكدا پرۆسەی دابەشكردنی فۆڕمی یەكەكانی نیشتەجێبون و كاراكردنی فۆڕمەكەی بەشێوەی ئۆنلاین بۆ هاوڵاتیانی كەمدەرامەت راگەیاندو ئەوانیش دەستیان بە پرۆسەی پڕكردنەوە كردوە.
هەروەها هاتوە كە پڕكردنەوەی فۆڕمەكە تاكو رۆژی 1-12-2023 بەردەوام دەبێت و هەر خێزانێكیش بە ناردنی داواكارییەكەی لەڕێی ئەژماری تایبەت بەخۆی تا كۆتاییی سیستمەكە دەسەڵاتی پێداچونەوەی زانیارییەكانی هەیە، هەر لە رێی ئەو ئەژمارەشەوە توانای وەرگرتنەوەی ئەنجامەكانی هەیە.
