واژۆ
محەمەد شیاع سودانی سەرۆكی ئەنجومەنی وەزیرانی عیراق و مەسرور بارزانی سەرۆكی حكومەتی هەرێمی كوردستان و شاندی یاوەری كۆبونەوە.
بەگوێرەی راگەیەنراوێكی نوسینگەكەی، محەمەد شیاع سودانی پێشوازی لەسەرۆكی حكومەتی هەرێمی كوردستان و قوباد تاڵەبانی جێگری سەرۆكی حكومەتی هەرێم و شاندی یاوەری كردوە.
هەروەها هاتوە كە لە كۆبونەوەیەكدا جەختیان كردۆتەوە لە سەر گرنگی دۆزینەوەی چارەسەرێك بۆ كێشە یاسایی و داراییەكانی نێوان حكومەتی فیدراڵی و حكومەتی هەرێم بە پێی دەستورو یاسا.
راشگەیەنراوە كە سەرۆكی ئەنجومەنی وەزیران جەختیكردۆتەوە لەوەی كە حكومەتی ئێستا پشت دەبەستێت بە بنەمای كاركردن بۆ پتەوكردنی سەقامگیریەكی هەمیشەیی دور لە جیاوازییەكان، هەروەها جەختیشی لە سەر جدیەتی حكومەت كردۆتەوە لە دۆزینەوەی چارەسەری ریشەیی بۆ مامەڵەكردن لەگەڵ هەرێمی كوردستان و ئاماژەشی بەوەكردوە كە حكومەت كاریكردوەو بەردەوامە كە كێشە یاسایی و ئیدارییەكان كاریگەرییان نەبێت لەسەر پێداویستییەكانی ژیانی هاوڵاتیانی عیراق بە هاوڵاتیانی هەرێمیشەوە.
