واژۆ
بەڕێوەبەری هونەری لە دەستەی ژینگەی هەرێمی كوردستان دەڵێت، خۆمان بۆ بەشداریكردن لە كۆنفرانسی جیهانی گۆڕانی كەشوهەوا ئامادەكردوە كە بڕیارە لەكۆتایی مانگی 11ی ئەمساڵ لە ئیمارات بەبەشداری ژمارەیەكی زۆری وڵاتان سازبكرێت.
ئازاد نوری عەوڵا بەڕێوەبەری هونەری لە دەستەی ژینگەی هەرێمی كوردستان بۆ ماڵپەڕی فەرمی پارتی رایگەیاندوە: ئامادەكارییەكان بۆ بەشداریكردن لە كۆنفرانسی جیهانی گۆڕانی كەشوهەوا لە وڵاتی ئیمارات بەردەوامی هەیەو پێش چەند رۆژێك وۆركشۆپێكی دوو رۆژەمان ئەنجامدا، خۆمان بە تەواوی بۆ ئەو كۆنفرانسە ئامادەكردوە كە چیمان پێویستەو چی بكەین و لە كامە كەرت پێویستمان بە پرۆژە هەیە، ئەمانە هەموی كراوە بۆئەوەی پشتگیری نێودەوڵەتی وەربگرین تا بتوانین لە داهاتو روبەڕوی كارەساتە سروشتییەكان ببینەوە.
وتیشی: زۆرینەی وڵاتانی زلهێز بەشداری لەو كۆنفرانسە دەكەن لەگەڵ وڵاتانی عەرەبی و ئەوانەی هەژاریشن، بۆیە كۆنفرانسەكە زۆر گرنگەو لەوێ دەتوانرێت پڕۆژە پێشكەش بكرێت بۆئەوەی هاوكاری بكرێن بۆ جێبەجێ كردنیان، چونكە عیراق پێنجەم وڵاتە كاریگەری گۆڕانی كەشوهەوای لەسەرە، كە هاوكاری عیراق بكرێت هەرێمی كوردستانیش دەگرێتەوە.
