سەرۆکی هەرێمی کوردستان کاک نێچیرڤان بارزانی / سەرۆکی حکومەتی هەرێمی کوردستان کاک مەسرور بارزانی
دوای سڵاو و رێز
بەرێز سەرۆکی هەرێمی کوردستان بەڕێزتان لە بەرواری 8 کانونی یەکەمی ساڵی 2021 لە بەژداریتان لە پرۆسەی سوێند خواردنی سەرۆکی دادگای پێداچوونەوەی هەرێم
فەرمووتان ( پشتگیری تەواوی خۆم بۆ سەروەری یاسا و دامەزراوە دادوەریەکان دووپات دەکەمەوە )
بەرێز سەرۆکی حکومەتی هەرێمی کوردستان بەرێزتان لەبەرواری 22/6/2022 سەردانی وەزارەتی ناوەخۆتان کرد لەوێ فەرمووتان
( دەبێ یاسا بە یەکسانی بە سەر هەموو کەسێکدا جێبەجێ بکرێت و نابێت کەس لە سەرووی یاساوە بێت.)
شك لەوەدا نیە کە بەرێزتان بەردەوام پاڵپشت و بەدیهێنەری سەروەری یاسا بوونە .. بەڵام بەپێویستم زانی کە بەرێزتان لە ناسەروەری و باڵادەستی بەرپرسێک ئاگادار بکەمەوە کە ئەوەی لای بابەت نەبێ یاسایە …!
دوا بەدوای دەست پێکردنەوە بەگرتنەبەری رێڕەوی لێکۆڵینەوە تایبەت بە دۆسیەی کوشتنی خێزانم بەدەستی تۆمەتبار ( ژیر سەرباز نادر هەورامی )
دادگا بڕیاری دەستگیرکردنی بۆ تۆمەتبار دەرکرد و بڕیاری ئامادەکردنی بۆ باوکی تۆمەتبار ( سەرباز هەورامی ) دەرکرد .
بەڵام تا ئێستا نە تۆمەتبار دەستگیردەکرێت وە نە سەرباز هەورامی سەڕەڕای پێڕاگەیاندنی لەبەردەم دادگا ئامادە دەبێت!
ئێستا دەمەوێت پێتان رابگەیێنم چەند رۆژێکە لەلایەن تۆمەتبارانەوە بە ژمارەی نەناسراو هەرەشەی کوشتنم لێدەکرێت ئەگەر بەزووترین کات دەست لەم داوایە هەڵنەگرم لە دادگا .
بەرێزان سەرۆکی هەرێمی کوردستان … سەرۆکی حکومەتی هەرێم لەبەرێزتان دەپرسم دەکرێت لە ژێر سێبەری حوکمی بەرێزتان دا بەرپرس هەرەشە لە ژیانی هاونیشتیمانیان و زوڵم لێکراوان بکات ؟
دەکرێت یاسا سەروەرنەبێ ؟ دەکرێت یاسا بەسەر هەموو کەسێک وەک یەک جێ بەجێ نەکرێ ؟
روونە کە ئێوە هەردەم لەگەڵ چەسپاندنی یاسا بوونە بەڵام دوور و نزیک ئاگاداری رەفتار و کاری بەشێک لە بەرپرسەکان نین کە چۆن لەژێر سێبەری دەستەڵاتی ئێوەدا بەربوونەتە گیانی هاوڵاتیانی بێ دەستەڵات و تەنانەت دادگاکانیش ..
لەکۆتاییدا هیوادارم ئەم پەیامەم بگاتە دەست ئێوەی بەرێز و سەلامەتی ژیانى خۆم و خانەوادەکەم وەك ئەمانەتێك دەخەمە ئەستۆی ئێوەی بەرێز .
هیوادارم وەک بەرزترین دەستەڵاتی جێبەجێکردنی یاسا هاوکاربن بۆ بەجێ گەیاندنی تەواوی بڕیارەکانی دادگا و بەسزاگەیاندنی تۆمەتباران جا لەهەر پلە و پایەیەک بێ .
کوردستان هەر ئاوەدان و یاسا سەروەربێ
پارێزەر
ڕێبوار خۆشناو
30/10/2022
