واژۆ
بەپێی پێشبینییەكانی كەشناسی، بارانبارین بەردەوام دەبێت و پلەكانی گەرماش بەشێوەیەكی بەرچاو نزمبوونەوە بەخۆیانەوە دەبینن.
كەشناسی هەرێم بڵاویكردووەتەوە، بەپێی پێشبینییەكان ئەمڕۆ چوارشەممە ئاسمان هەور دەبێت بەگشتی و لە پارێزگای هەولێر و ناوچە شاخاوییەكان بارانبارین دەبێت، لە هەندێك كاتدا لە ناوچە شاخاوییەكان ئاستی دابارین مامناوەندە و لە پارێزگای دهۆك و ناوچە شاخاوییەكان ئەگەری نمەباران هەیە لە هەندێك كاتدا.
ئەوەش هاتووە، لەئەنجامی كاریگەری نزمە پاڵەپەستۆی دەریای سوور لەسەر بەشەكانی ناوەراستی عیراق و باشووری هەرێم بەتایبەتی، بارانبارین لە پارێزگای سلێمانی و كەركوك و هەڵەبجە زیاتر دەبێت و هەندێك كات بارانبارینی بەلێزمە و بارانی مامناوەند لەسەر ناوچە جیاجیاكان دەبارێت، لە كاتەكانی شەودا كاریگەری ئەم نزمە پاڵەپەستۆیە لاواز دەبێت بارانبارین تەنها بەشێوەی نمەباران و كەم لەسەر ناوچە شاخاوییەكان دەمێنێتەوە، پلەكانی گەرماش “6 بۆ 8” پلە نزمبوونەوە بەخۆیانەوە دەبینن.
سەبارەت بە كەشوهەوای سبەینێ پێنجشەممە باس لەوەكراوە، ئاسمان هەور و نیمچە هەور دەبێت و ئەگەری نمەباران هەیە لەسەنتەری پارێزگاكاندا لە هەندێك كاتدا، لە ناوچە شاخاوییەكان و شاخاوییە سنوریەكان تاوە باران دەبێت لە هەندێك كاتی جیاجیادا، پاشان ئاسمان دەگۆرێت بۆ نیمچە هەور بەگشتی و پلەكانی گەرماش كەمێك بەرزتر دەبنەوە لەچاو تۆماركراوەكانی ئەمڕۆ.
بەرزترین پلەكانی گەرمای پێشبینیكراو بە پلەی سیلیزی
هەولێر: 20
سلێمانی: 19
دهۆك: 21
كەركوك: 21
هەڵەبجە: 21
زاخۆ: 22
گەرمیان: 23
حاج ئۆمەران: 12
سۆران: 19
