نووسینی : هاوکار گۆمەشینی
پێش کردنی ڕیفراندۆم و یان بابڵێین کۆتا ڕۆژەکانی ڕیفراندۆم هەرێمی کوردستان زۆر بەهێزبوو وەک دەوڵەت مامەڵەی لەگەڵ دەکراو دەکرد، ئەو بەهێزیەی هەرێم وایکرد (تیلرسۆن) خۆی بگاتە هەرێم و داوا لەبکەران و سەرانی ڕیفراندۆم بکات کە خۆیان بگرن ئەو کارە نەکەن و خۆیان بەدوور بگرن لەهەڵەی ئاوا بۆ ساڵێکیتر دوای بێخن،لەپاداشتی دواخستن ئەمریکا پاداشتیان دەداتەوە.!
کەچی کردیانە عینادی و ڕیفراندۆمیان کرد تا لەسەدا ٥١ی خاکمان لەدەستداو گەڕینەوە خاڵی سفر،ئەوەی ئێستا ڕوو دەدات هەر لە نەهاتنی مووچەوە تا دەگاتە تەواوی بابەتەکانیتر دەرئەنجامی ڕیفراندۆمەکەیە.
ئێستاش هەمان چارەنوس بگرە بەخراپتر چاوەڕێی ئەو قەوارەو هەرێمە دەکات،ئەگەر بێتوو دیسان عینادی بکەن لەسەر نەکردنی هەڵبژاردن و بەقسەی ئەمریکا نەکەن،ئەوەتا ئەوجارە بە سەرۆک وەزیرانی عێراق پەیامی بەناوی ئەمریکا ناردوە بۆ دەسەڵادارانی هەرێم ،کەوا هەڵبژاردن لە کات و ساتی خۆیدا بکەن ئەگەرنا هەرێم توشی گرفتی گەورە دەبێت و خۆیان لێی بەرپرسیارن.!
قسەکە ئەوەیە ئەگەر ئەجارە دیسان بەقسەی ئەمریکایان نەکردو کەوتنە هەڵەی ئاوا،خۆ هیچیان بەدەستەوە نامێنێ تا هاوڵاتیان و خەڵک و حیزبەکانیتری پێ تاوانبار بکەن و موزایەدەی کوردایەتی بکەن،دوایی تۆپ دەتەقێ و فەریقیش تێک دەچێ و جەماعەتیش دەچنەوە ماڵە ئەسڵەکەی خۆیان.!
