بڕیاردەری فراكسیۆنی یەكێتی لە ئەنجومەنی نوێنەرانی عیراق رایدەگەیەنێت ئەگەر هەڵبژاردنی پەرلەمانی كوردستان لە وادەی دەستنیشانكراوی خۆیدا نەكرێت، لە قۆناغی داهاتودا دادگای فیدراڵی رەوایەتیی دامەزراوە فەرمییەكانی هەرێمی كوردستان هەڵدەوەشێنێتەوە.
كاروان یاروەیس بڕیاردەری فراكسیۆنی یەكێتیی نیشتمانیی كوردستان رایگەیاند، دادگەی فیدراڵی قەیرانی موچەی هەرێمی كوردستانی چارەسەركرد و بەپێی بڕیارەكە، فەرمانبەران و موچەخۆران لە بەسرەوە تاوەكو زاخۆ بە یەك خشتە و یەك سیستم و شێواز موچە وەردەگرن.
بڕیاردەری فراكسیۆنی یەكێتیی نیشتمانیی كوردستان وتیشی: حكومەتی عیراق لەگەڵ ئەوەدا نەبوو موچەی فەرمانبەرانی هەرێمی كوردستان دابەشبكات، بەڵام ناچارە پابەندبێت بە بڕیارەكەی دادگای فیدراڵی.
كاروان یاروەیس رەتیشیكردەوە كە ئەو وردبینییە كێشە بۆ موچەی فەرمانبەرانی هەرێمی كوردستان دروست بكات و وتی، وردبینیی لیستەكە گرفت بۆ دابەشكردنی موچە دروست ناكات و هەركات وردبینییەكە تەواوكرا ئەگەر كەسێك دوو موچەی وەرگرتبێت ئەوا لێی وەردەگیرێتەوە.
