بەرەبەیانی ئەمڕۆ سێشەممە، بومەلەرزەیەك ناوچەی فەنوج لە پارێزگای سیستان و بەلوچستان لە رۆژهەڵاتی ئێرانی هەژاند و لە چەندین شار و ناوچەی دیكەی ئەو پارێزگایەش هەستی پێكرا.
بەپێی ئەو زانیارییانەی لە میدیای فەرمیی ئێران بڵاوكراونەتەوە، گوڕی بومەلەرزەكەی سیستان و بەلوچستان 5.6 ریختەر بووە، ناوەندی بوومەلەرزەكە شاری فەنوج بوە و لە قوڵایی 80 كیلومەتەری زەوی روویداوە.
سەید محەمەدمەهدی سەجادی، بەڕێوەبەری گشتیی كۆمەڵەی مانگی سوری پارێزگای سیستان و بەلوچستان رایگەیاند، تیمەكانی مانگی سوور بەمەبەستی لێكۆڵینەوە و بەداواداچوونی زیانەكان رەوانەی ناوچەی بوومەلەرزە كراون و هەموو ناوەند و بنكەكانیان لە سنووری پارێزگای سیستان و بەلووچستان خراونەتەوە ئامادە باشیەوە.
