بریارە ئێوارەی ئەمڕۆ یەكشەممە، لە ڕێوڕەسمێكی تایبەتدا پڕۆژەی ئەندەرپاسی (فاروق) لەسەر شەقامی بازنەیی مەلیك مەحموود بەڕووی هاوڵاتیان و شۆفێراندا بكرێتەوە.
سەرۆكایەتی شارەوانی سلێمانی رایگەیاند، ئەندەرپاسەكە بە یەكێك لە پڕۆژە گرنگ و ستراتیجییەكانی شاری سلێمانی دادەنرێت، هۆكارێك دەبێت بۆ ئاسانكاریی هاتووچۆ و كەمكردنەوەی جەنجاڵی ئۆتۆمبێل، لە ڕێگایەوە شەقامی بازنەیی مەلیك مەحموود و گەڕەكەكانی سەیوان، ئازادی، مامەیارە بە گەڕەكەكانی ئیبراهیم ئەحمەد و كازیوە و قڕگە دەبەستێتەوە.
ئاماژەی بەوەشدا، كردنەوەی ئەم پڕۆژە گرنگە لە كاتێكدایە هەریەك لە پڕۆژەكانی شاڕێی پێشمەرگە (باخی بەختیاری) و پڕۆژەی یەكتربڕی ئارام لە ماوەی دوو مانگی ڕابردوودا پاش كۆتاییهاتنی كاركردن تیایاندا بەڕووی هاوڵاتییان و شۆفێراندا كرانەوە.
لە بڵاوكراوەكەدا باس لەوەش كراوە، بڕیارە لە ئایندەیەكی نزیكدا بەپێی ئەو بەرنامەیەی سەرۆكایەتیی شارەوانیی سلێمانی جێبەجێی دەكات چەند پڕۆژەیەكی دیكەی گرنگ كۆتایی بەكارەكانیان بێت و بخرێنە خزمەت هاوڵاتییانەوە.
