لە ماوەی هەشت رۆژی رابردودا زیاتر لە 645 هەزار زیارەتكاری ئێرانی لە دەروازەی سنوریی مێهرانی پارێزگای ئیلامەوە تێپەڕیون.
محەمەد سوبحان حەسەنی جێگری سەرۆكی لیژنەی زیارەتكارانی پارێزگای ئیلامی رۆژهەڵاتی كوردستان رایگەیاند، لە 6ـی ئابەوە تاوەكو دوای نیوەڕۆی 14ـی ئاب، زیاتر لە 645 هەزار زیارەتكار بە دەروازەی سنوریی مێهرانی پارێزگاكەدا تێپەڕیون .
باسی لەوەشكردوە، تەنها لە 14ـی ئابدا زیاتر لە 150 هەزار زیارەتكار لە دەروازە سنورییەكەوە هاتوچۆیان كردوە كە 124 هەزاریان بەرەو عیراق تێپەڕیون و 26 هەزاریشیان لە شوێنە پیرۆزەكانی عیراقەوە گەڕاونەتەوە ئێران.
لای خۆشیەوە حەسەن بەهرامنیا پارێزگاری ئیلام بە میدیای فەرمی وڵاتەكەی راگەیاندوە، بڕیارە وێستگەكانی تەواوكردنی مامەڵەی زیارەتكاران بۆ تێپەڕین لە دەروازەكە زیاتر بكرێن، بۆئەوەی پڕۆسەی هاتوچۆیان خێراتر بكرێت.
دەروازەی سنوریی مێهران لە پارێزگای ئیلامەو یەكێكە لە دەروازە سەرەكییەكانی نێوان ئێران و عیراق بۆ هاتوچۆی گەشتیاران و ئاڵوگۆڕی بازرگانی كە بەهۆی نزیكی زیاتری لە شوێنە پیرۆزەكانی شیعە لەعێراق، ساڵانە زۆرترین زیارەتكار هاتوچۆی پێدا دەكەن.
