ئەمڕۆ قۆناغی كۆتایی پرۆسەی سەرژمێری گشتیی دانیشتوانی هەرێمی كوردستان دەستپێدەكات.
وەزارەتی پلاندانانی هەرێم لە ڕاگەیەندراوێكدا بڵاویكردەوە، ئەم قۆناغە ئامانجی سەردانكردنی سەرجەم خێزانەكانە لە ناوچە جیاجیاكانی هەرێم بەمەبەستی وەرگرتنی وەڵامی پرسیارنامەی سەرژمێری ماڵان.
ڕونیشیكردەوە، بژمێرەكان 77 پرسیار لە خێزانەكان دەكان كە پرسیارنامەی باری دیمۆگرافی، كۆمەڵایەتی، ئابوری، پەروەردەیی، تەندروستی، كار و بێكاری، نیشتەجێبوون، كۆچ، هۆیەكانی گۆڕینی شوێنی نیشتەجێبوون و زانیاری كارتی نیشتمانی و فۆرمی خۆراك رۆژی لەدایكبوون، ژمارەی ئەو كەسانەی مردوون لەنێو خێزاندا، لە خۆدەگرێت.
ئاماژەی بەوەشكردوە، پرسیارەكان پەیوەستن بە خزمەتگوزارییە سەرەتاییەكانیش وەك بەردەستبونی ئاو و كارەبا و پێداویستییەكانی ماڵ.
هەروەها، سەبارەت بە هاوڵاتییانی ناوچە كوردستانییەكانی دەرەوەی هەرێم، ئەوانەی لەقۆناغی دووەم گەڕابوونەوە زێدی خۆیان، وەزارەتەكە دەڵێت، پێویست دەكات بۆ قۆناغی كۆتایش یەك كەس لەئەندامانی خێزانەكانیان بگەڕێنەوە ناوچەكانی خۆیان بۆ وڵامدانەوەی پرسیاری بژمێرەكان بۆ ئەوەی مافیان نەفەوتێت و دەرئەنجامی پرۆسەكەش بەشێوەیەكی دروست كۆتایی پێبێت.
