رۆژنامەكانی ئەمریكا
“فەرماندەكانی فەیلەقی قودس و باڵیۆزخانەكەی لە سوریا گواستوەتەوە”
وڵاتانی عەرەبی داوایان لە ئەسەد كردووە دیمەشق بەجێبهێڵێت
“ژن و منداڵەكانی ئەسەد سوریایان بەجێهێشتووە”
رۆژنامەی “نیویۆرك تایمز”ی ئەمریكی ئاشكرایدەكات، دوێنێ هەینی ئێران دەستیكردووە بەگواستنەوەی فەرماندە سەربازییەكانی و فەرمانبەرەكانی لەسوریا.
بەرپرسانی ئەمریكا بە رۆژنامەكەیان وتووە: بەمزوانە دیمەشق روبەڕوی هەڕەشە دەبێتەوە، ئەوەش بەهۆی بەردەوامی پێشڕەویكردنی گروپە چەكدارەكانی ئەو وڵاتە لەباكورو باشورەوە بەرەو پایتەخت.
بەگوێرەی رۆژنامەكە، لەنێو ئەو كەسانەی تاران گواستونیەتیەوە بۆ عێراق و لوبنان، گەورە بەرپرسانی فەیلەقی قودسی سەربە سوپای پاسدارانی ئێرانی تیادابووە، لەگەڵ ئەندامانی سوپای پاسداران و هەندێك لەكارمەندانی باڵیۆزخانەكەی و خێزانەكانیان، لەگەڵ ژمارەیەك هاوڵاتی ئێرانی.
لەلایەكی ترەوە، رۆژنامەی “وۆڵ ستریت جۆڕناڵ” ئەمریكی بڵاویكردەوە، بەگوێرەی لێدوانی بەرپرسانی ئەمنی سوریا، بەشار ئەسەد دوێنێ هەینی لە دیمەشقی پایتەخت بووە، لەكاتێكدا ژن و منداڵەكانی هەفتەی رابردوو رۆیشتون بۆ روسیا.
بەگوێرەی رۆژنامەكە، بەرپرسانی میسرو ئوردون داوایان لە ئەسەد كردووە سوریا بەجێبهێڵی، بەڵام باڵیۆزخانەی ئوردون لە واشنتۆن ئەو هەواڵانەی رەتكردووەتەوە.
رۆژنامە ئەمریكیەكە ئەوەشی ئاشكراكردووە، ئەسەد داوای لە توركیا كردووە یاخیبوەكان رابگرێت، هەوڵی بەدەستهێنانی چەك و هاوكاری هەواڵگری داوە لەوڵاتانی وەك ئیمارات و میسرو ئوردون و عێراق، بەڵام داواكەی رەتكراوەتەوە.
