محەمەد حاجی مەحمود سكرتێری حزبی سۆسیال دیموكراتی كوردستان رایگەیاند: بارودۆخی عیراق بۆ خراپتر هەنگاو دەنێت و سەدریش ئەوەی دەیەوێت لەوە گەورەترە كە دەبینرێت و دەبیسترێت.
محەمەد حاجی مەحمود بڵاویكردۆتەوە، لەو ماوەیەدا كێشەو ئاڵۆزی و ئاشوب و لێكترازان و بێ سەروبەری روی لەعیراق كردوە كە بە زۆر لكێنراوە بەیەكەوە، پەرلەمانیش بوە بە جێگای گاڵتەجاری و سوكایەتی پێكردن و ترسی ئەوەشم هەیە جارێكی كە ئەندامانی پەرلەمان بڕۆنەوە ناو پەرلەمان و بڕیاری چارەنوسی عیراق بدەن، ئەوانەی ناو پەرلەمان دەستیان بۆ شتێكی مەترسیدار بردوە، ئەوەش گۆڕینی دەستوری عیراقەو هەر بەندێكی دەستوری عیراق دەستكاری بكرێت لە دژی كوردو كوردستانەو دەستور بە رێكەوتن كراوە، ئەگەر بەتەوافق نەبێت نابێ بگۆڕدرێت.
دەشڵێت: هەرچەندە لە عیراق كار بە دەستور نەكراوەو ناكرێت، هەموو شتێك قابیلی رودانە، بەڵام هەموو ئەو كێشانە دادگای عەرەبی و كازمی لێی بەرپرسن، دادگا بەربەستێكی دانا كە حكومەت دروست نەكرێت بەبێ ئامادەبونی 220 ئەندام پەرلەمان و ئێستا هەمان بڕیار كاریگەر بوو لەنێوان موقتەداو پارتی و سونەدا، ئێستا بگرە لە بەردەم چوارچێوەشدا بۆ دروستكردنی حكومەت كە خۆی بەشێك بوو لە دروستكردنی ئەو بەربەستەی 220 ئەندام پەرلەمانە كە بەربەستێكی قورسە بۆ عیراقیەكان.
سكرتێری حزبی سۆسیال دیموكراتی كوردستان ئاماژەشیكردوە، بارودۆخەكە بەرەو خراپتر دەڕوات و ئەوەی سەدریش دەیەوێت لەوە گەورەترە كە دەبینرێت و دەبیسترێت، ئەو دەیەوێت بە ئەمریكاو بەریتانیاو ئەوروپاو سونە بڵێت من خاوەن بڕیارم لە عیراقداو مەرجەعیەت مافی سەید موقتەدا سەدرەو شیعەی عیراق جیا دەبێتەوە لەژێر مەرجەعیەتی قوم و شیعەی عەرەب نەجەف و موقتەدایە، ئەوەش بە چرای سەوزی ئەمریكاو رێنمایی بەریتانیاو سەردانی پاپای ڤاتیكان بۆ عیراق و پارەی سعودیە ئەو پڕۆژەیە بەردەوامە، بۆیە كورد نابێ بە دەستكاری دەستور خۆی بگلێنێت بە كێشەیەك كە كێشەی كورد نییە.
