واژۆ
ئەندامێكی پەرلەمانی كوردستان رایدەگەیەنێت، دەستوەردان و ناكۆكی نێوان یەكێتی و پارتی هۆكاری كۆنەبونەوەو پەكخستنی دانیشتنەكانی پەرلەمانی كوردستانن.
رزگار محەمەد نەگڕەیی ئەندامی پەرلەمانی كوردستان لە فراكسیۆنی گۆڕان بەسایتی حزبەكەی راگەیاندوە، پەككەوتنی كارەكانی پەرلەمان بەهۆی ناكۆكی یەكێتی و پارتییەوە بابەتێكی نوێ نیەو لە یەكەم خولی پەرلەمانەوە چەندینجار كارەكانی پەرلەمان بەهۆی ئەو ململانێ و ناكۆكیانەوە لەلایەن ئەو دوو هێزەوە پەكخراون كە ئەو ناكۆكیانەش لەپێناو بەرژەوەندی باڵای خەڵك و باشتر ئیدارەدانی دامەزراوەكان نیە، بەڵكو بەهۆی ناكۆكی و بەرژەوەندییە حزبیەكانیانەوەیە.
راشیگەیاندوە: ئێستاش بە ئیعاز و دەستوەردانی حزبی پەرلەمان كۆنابێتەوەو پەكخراوە، لەكاتێكدا دەبو گرنگی پەرلەمان بپارێزرایە بەوپێیەی مەرجەعی یاسایی و دامەزراوەیەكی گرنگ و گەورەی هەرێمی كوردستانە، بەڵام پارتی و یەكێتی ئەوە نابینن و نایانەوێت پەرلەمان كارابێت و كارەكانی بەشێوەیەكی پەیڕەویی بەڕێوەببات و هەمیشە دەیانەوێت بەرامبەر حكومەت و دامەزراوەكانی دیكە بێ رۆڵ و كاریگەری بكەن.
