وتەبێژی حكومەتی هەرێمی كوردستان روونكردنەوەیەكی بڵاوكردووەتەوە دەڵێت، ”ئەو فڕۆكە ئەمریكییانەی هێرشیان كردەسەر میلیشیاكان، لە فڕۆكەخانەی هەولێرەوە نەفڕیون و ئەوەی دەگوترێت دوورە لە راستییەوە.”
جووتیار عادل، وتەبێژی حكومەتی هەرێمی كوردستان لە روونكردنەوەكەدا رایگەیاندووە، “لەم رۆژانەدا یەكێك لە بەرپرسەكانی میلیشای ( كتائب سید الشهدا) بەناوی ئەحمەد المكسوس بانگەشەی ئەوەی كردبوو كە گوایا ئەو فڕۆكە ئەمەریكییانەی هێرشیان كردە سەر میلیشیاكان، لە فڕۆكەخانەی هەولێرەوە فڕیون. ئێمە ئەم قسانە رەتدەكەینەوە چونكە هیچ بنەمایەكیان بۆ نییە.”
وتەبێژی حكومەتی هەرێمی كوردستان پێیوایە ئەو هێرشانەی كراونەتە سەر هەولێر “لەلایەن گرووپە لە یاسادەرچووەكانەوە بووە و ئێستاش ئەم قسانە مانایەكی خراپ دەگەیێنن.”
لە بەشێكی دیكەی روونكردنەوەكەدا ئاماژە بەوە دراوە، هەر هێرشەكی دیكە بكرێتە سەر هەولێر “گومان دەكەوێتە سەر ئەو لایەنەی ئەحمەد مەكسوس و هاوچەشنەكانی نوێنەرایەتی دەكەن، چونكە ئەمە رێخۆشكردن و پاساو هێنانەوەی پێش وەختەیە بۆ بەئامانجگرتنی هەولێر.”
