شانەی راگەیاندنی ئەمنی وردەكاری تەقینەوەكانی بەغدای ئاشكراكرد

شانەی راگەیاندنی ئەمنی عیراق وردەكاری تەقینەوەكانی سەربازگەی صقری باشوری بەغدای ئاشكراكرد و باسی لەوەكردوە، بەهۆی بەرزبونەوەی پلەی گەرماوە كۆگای چەك و تەقەمەنی تەقیوەتەوە.
دوێنێ دوو تەقینەوە لە نێو سەربازگەكەدا رویدا و لەوبارەیەوە شانەی راگەیاندنی ئەمنی لە بەیاننامەیەكدا ئاماژەی بەوەداوە، دوای ئەوەی تیمەكان گەیشتونەتە شوێنی تەقینەوەكە لێكۆڵینەوەیان دەستپێكردوە و دەركەوتوە تەقینەوەكان لە كۆگای چەك و تەقەمەنی پۆلیسی فیدراڵیدا رویداوە و هۆكارەكەشی بۆ بەرزبونەوەی پلەكانی گەرما و خراپی كۆگاكردنەوە دەگەڕێتەوە.
ئەوەشی رونكردوەتەوە، هەوڵە ئەندازیاریەكان و بەرگری شارستانی و هێزەكان بەردەوامدەبن لە لێكۆڵینەوە لە رووداوەكە.