دەسەڵاتدارانی ئەمنیی ویلایەتە یەكگرتووەكانی ئەمریكا ئاشكرایانكرد، ئەو ژنەی هەوڵی ژەهراویكردنی دۆناڵد ترامپ سەرۆكی وڵاتی داوە، دەستگیركرا.
تۆڕی CNN لەزاری بەرپرسانی ئەمریكاوە بڵاویكردوەتەوە، ئەو ژنەی دەستگیركراوە، گومانی ئەوەی لەسەرە پۆستەیەكی ژەهراوی ناردبێت بۆ ترامپ، كە پێش ئەوەی پێی بگات پوچەڵكراوەتەوە.
بەوتەی بەرپرسەكان، ژنەكە كاتێك دەستگیركراوە، كە لە كەنەداوە هەوڵی داوە بچێتە ویلایەتی نیویۆركی ئەمریكا و لەكاتی دەستبەسەركردنیشیدا، چەكێكی پێبوە. هەروەك ئەگەری ئەوە هەیە لەلایەن ئیدارەی ئەمریكاوە سكاڵای لەسەر تۆماربكرێت بەهۆی ئەو كارەی ئەنجامیداوە.
لە چەند رۆژی رابردودا، لە رێگەی پۆستەیەكەوە، كە ئاراستەی كۆشكی سپی كرابو، هەوڵی ژەهراویكردنی دۆناڵد ترامپ سەرۆكی ئەمریكا درا لە رێگەی ماددەی “ریسین”ەوە، بەڵام لەلایەنFBI و خزمەتگوزاریی نهێنییەوە هەوڵەكە شكستیپێهێنراو دواتر وابڵاوكرایەوە پۆستەكە لەلایەن ژنێكەوە لە كەنەداوە نێردراوە.
