10 نوێنەری كورد لە پەرلەمانی عیراق رای گشتی ئاگاداردەكەنەوە، كە گرێدانی كۆبونەوەی سەرۆكایەتییەكانی هەرێم و نوێنەرانی كورد بەپێویست نازانن و داوا دەكەن بەزووی شاندێكی هەرێم بچێتە بەغدا بۆ ئەنجامدانی رێككەوتنێكی گشتگیر و شەفاف و كۆنكرێتی.
ئەمەش دەقی راگەیەندراوەكەی پەرلەمانتارەكانە:
راگەیاندراوێك بۆ رای گشتی
ئێمە ئەم پەرلەمانتارانەی لەخوارەوە ناومان هاتووە، رایگشتی ئاگادار دەكەینەوە كە گرێدانی كۆبونەوەی سەرۆكایەتییەكانی هەرێم و نوێنەرانی كورد بەپێویست نازانین. لەبەر ئەم هۆكارانەی خوارەوە:
یەك: حكومەتی عێراق و هەرێم بەرپرسیاری یەكەمی ئەم دۆخە هەڵدەگرن. پرسی موچە و نەوت رونەو پێویستی بە كۆبونەوەی نمایشكارانە نیە. هێشتا دەرفەت ماوە و حكومەتی هەرێم دەتوانێت وەفد بنێرێتە بەغدا و هەرچی زووە رێكەوتنێكی نوێ و گشتگیر و شەفاف و كۆنكرێتی لەگەڵ بەغدا واژۆ بكەن لەسەر بنەمای دەستور نەك عیلاقاتی شەخسی و حزبی و سەفەقاتی ژێر بە ژێر.
دوو: دەسەڵاتدارانی هەرێم ئەم كۆبونەوانەیان زیاتر وەك نمایشێكی سیاسی دەوێت، تا لەو رێیەوە شەرعیەت بدەن بە سیاسەتە شكستخواردوەكانیان. ئێمەش ئامادەنین بەشێك بین لەو سیاسەتە.
سێ: خەڵكی كوردستان چاوەڕێی هیچ لەمجۆرە كۆبونەوانە ناكەن و باشترە حكومەتی هەرێم سەرقاڵی دابینكردنی موچەی فەرمانبەران بێت.
چوار: تا ئەم ساتە هیچ چاكسازییەكی راستەقینە نیه و قاچاخچێتی و دزینی سامان و داهاتەكان بەردەوامە و سەرباری ئەوەش دەیان چالاكوان و رۆژنامەنوس لە زیندانەكانی هەولێرو دهۆك و ناوچەكانیتردان، بەبیانوی نایاسایی و دەزگا ئەمنیەكانیش سەرقاڵی دروستكردنی تۆمەتی بێ بنەمان بۆیان.
دەیان هۆكاریتریش هەن كە وامان لێدەكات بەشداری ئەمجۆرە كۆبونەوە بێ بەرهەمانە نەكەین.
1-احمد حاجی رشید
2-رێبوار كریم محمود
3- كاوە محەمەد
4-سەركەوت شەمسەدین
5-سروە ونس
6-یوسرا رەجەب
٧-غالب محمد علی
٨-بەهار محمود فتاح
٩-هۆشیار عەبدوڵڵا
١٠-موسەننا ئەمین
