پارێزگاری سلێمانی رایگەیاند، ئێمە لەگەڵ دووبارە داخستنی ناوەندەكانی خوێندن و دەسپێكردنەوەی كەرەنتینە و قەدەغەكردنی هاتوچۆدا نین، بەڵكو پێمان باشە هاوڵاتیان بەردەوامبن لەسەر رێكارە خۆپارێزیيەكان و دامودەزگا تەندروستییەكانیش ئامادەی پێشكەشكردنی چارەسەربن.
هەڤال ئەبو بەكر پارێزگاری سلێمانی لە لێدوانێكدا بۆ رۆژنامەنوسان راگەیاند، حاڵەتەكانی كۆرۆنا لە پارێزگای سلێمانی لە ژێر كۆنتڕۆڵدان، و ڤایرۆسە نوێكەش بڵاوبونەوەیەكی سروشتی هەیە،
وتیشی لەچەند رۆژی داهاتودا لیژنەی باڵای روبەڕوبونەوەی كۆرۆنا كۆدەبێتەوە تاوەكو لەسەر هەڵسەنگاندنەكانی وەزارەتی تەندروستی و پەروەردە بڕیاربدات.
پارێزگاری سلێمانی رونیشیكردەوە، دەبێت بەوردی دیراسەی بەرزبونەوەی ئامارەكانی كۆرۆنا بكەین، بەڵام ئەوەی گرنگە هەڵگرانی ڤایرۆسەكە تەندروستیان جێگیرە و مەترسی حاڵەتەكانی مردنیش زۆر دەگمەنن و ئێمە لەگەڵ ئەوەدا نین جارێكی تر ناوەندەكانی خوێندن دابخرێنەوە و كەرەنیتن دەستپێبكاتەوە و قەدەغەی هاتوچۆ رابگەیەنرێت.
