سەمیر هەورامی وتەبێژی جێگری سەرۆك وەزیرانی هەرێم دەڵێت: هەریەكێك لەو دوو پێشنیارەی لەبارەی پشكی هەرێم لە پرۆژە یاسای بودجە هەیە پەسەند بكرێت حكومەتی هەرێم پابەند دەبێت، لەمانگی نیسانی ساڵی رابردوشەوە سێ جۆر رێكەوتنیان كردوە.
سەمیر هەورامی لە گفتوگۆیەكی تەلەفزیۆنیدا باسی لەوەكردوە: لەمانگی نیسانی ساڵی 2020 تائێستا لەبارەی شایستە داراییە‌كانی هەرێم 3 جۆر رێككە‌وتنمان لە‌گە‌ڵ بەغدا ئە‌نجامداوە، لەئێستاشدا دوو پێشنیاز هەیە سەبارەت بە شایستە داراییە‌كانی هەرێم.
جەختیلەوەشكردوەتەوە: پێشنیازی حكومەتی عیراق و پێشنیازی لیژنە‌ی دارایی و كوتلە پە‌رلە‌مانیە‌كان، هە‌ركامێكیان پەسەند بكرێت حكومەتی هەرێم پابەند دەبێت بە‌جێبە‌جێ كردنی.
سەبارەت بە هۆكاری دواكەوتنی پەسەندكردنی بوجە وتویەتی: لیژنە‌ی دارایی ئەو بڕگە‌یە‌ی پەسەند كرد كە پە‌یوە‌ستە بە‌هە‌رێمی كوردستانە‌وە، بۆیە پشكی هەرێم هۆكار نییە لە دواخستنی دە‌نگدان لە‌سە‌ر بودجە، هە‌ركاتێكیش پێویست بكات وە‌فدی حكومەتی هەرێم دە‌چێتە‌وە بەغدا.
سەمیر هەورامی ئەوەشی ئاشكراكردوە: قوباد تاڵەبانی سە‌رۆكی وە‌فدی دانوستانكاری حكومەتی هەرێم بە‌لایە‌نی عیراقی وتوە، ئە‌گە‌ر پشكی هەرێم رێگرە لە خزمە‌تكردنی پارێزگاكانی ناوە‌ڕاست و باشور ئە‌وا بیبڕن و بۆ ئە‌وانی بنێرن، بە‌ڵام لە 2014وە چە‌ندین مانگ شایستە داراییە‌كان نە‌نێردراون و كێشە‌ی ئەو ناوچانە‌ش چارە‌سەر نە‌كراون.
