وتەبێژی وەزارەتی دەرەوەی رووسیا دەڵێت، مانۆڕە هاوبەشەكەی ئۆكرانیا و ناتۆ “پەیمانی باكووری ئەتڵەس” بۆ توڕەكردنە و ئامانجی درووستكردنی ناسەقامگیرییە بە درێژایی سنووری نێوان ئۆكرانیا و رووسیا.
مارایا زاخارۆڤا، وتەبێژی وەزارەتی دەرەوەی رووسیا ، لە كۆنفرانسێكی رۆژنامەوانیدا سەبارەت بە مانۆڕە سەربازییە هاوبەشەكەی ناتۆ لە ئۆكرانیا رایگەیاند: “بە روونی دوو ئامانج لەو مانۆڕە سەربازییە دەبینین، یەكەمیان بەردەوامیدانە بە ناسەقامگیری بە درێژایی سنووری رووسیا، بۆ ئەوەی تووڕەمان بكەن و هانمان بدەن وەڵامیان بدەینەوە، ئێمەش دەدەینەوە، لەبەر ئەوەی وڵاتێكی خاوەن سەروەرین و سەروەری سنوورەكەشمان دەپارێزین لە بەرامبەر ئەو دەستدرێژییە”.
وتیشی: “ئامانجی دووەمی مانۆڕەكە گواستنەوەی چەندین جۆری كەلوپەل و چەك و جبەخانەی سەربازییە بۆ ئۆكرانیا و دوای مانۆڕەكەش لەو وڵاتە جێیان دەهێڵن”.
بەهۆی كۆكردنەوەی هێزی سەربازی روسیا لەسەر سنورەكانی ئۆكرانیا ماوەیەكە گرژیی لە نێوان مۆسكۆ و وڵاتانی رۆژئاوایی سەریهەڵداوە و مانۆڕەكەی ناتۆش بە دەربڕینی پشتیوانی رۆژئاوا بۆ كیێڤ دادەنرێت.
