ئاژانسێكی فەرەنسی بڵاویكردووەتەوە، پەتای كۆرۆنا بووەتە دەرگایەكی تری گەندەڵی بۆ عێراق و تەنانەت خاوەن رێستۆرانت و كافتریا و مەیفرۆش و یانە شەوانەكان دەتوانن بە پێدانی پارە، لەكاتی قەدەغەی هاتووچۆ كار بكەن.
ئاژانسی “فرانس پرێس” بڵاویكردووەتەوە، پەتای كۆرۆنا بووەتە دەرگایەكی تری گەندەڵی لە عێراق، ئەویش لەلایەن چەند دەزگایەكی ئەمنی دیاریكراوەوە، كە كۆنترۆڵی ناوچەكانیان لەدەستە، خاوەن رێستۆرانت و كافتریان لەلایەن ئەو دەزگایانەوە پەستانیان دەخرێتەوە سەرو لەبەرامبەر كاركردن لە رۆژانی قەدەغەی هاتووچۆدا پێویستە پارە بدەن.
ئاژانسەكە جەختیلەوەشكردووەتەوە، لە وڵاتێكدا كە گەندەڵی بەڵایەكی درێژخایەنە و لە ریزبەندی گەندەڵترین وڵاتانی جیهاندا لە پلەی 21دایە، رێستۆرانتەكان دەرگاكانیان دادەخەن و رووناكییەكانی دەرەوە دەكوژێننەوە و بە نهێنی كار دەكەن، ئەوەش دوای رێكەوتنی لەگەڵ هەندێك لە گروپە چەكداری و سەركردە سەربازییەكاندا.
یەكێك لە خاوەنی رێستۆرانتەكان ئاماژەی بەوەداوە، دەزگا ئەمنییەكان بوونەتە هاوبەشی راستەقینەیان و پێویستە هەفتانە 500 هەزار دینار بدەن تا رێگەیان پێ بدرێت كاربكەن، ئاژانسەكە ئەوەشی روونكردووەتەوە، بەرتیل و خۆدزینەوە لە باج و گەندەڵی لە سەرجەم كەرتەكاندا لە ساڵی 2003ەوە 450 ملیار دۆلار زیانی بەم وڵاتە گەیاندووە كە ئەوەش نیوەی داهاتی نەوتە.
خاوەن كافتریایەك دەڵێت، زۆر هەوڵی ئەوەی داوە لە پێدانی بەرتیلەوە تێوەنەگلێت، بەڵام هیچ چارەیەكی تری نەبووە چونكە دەبینێت كە هاوڕێكانی كار دەكەن و ئەو تاكە كەسە یاسای بەسەردا جێبەجێ دەكرێت، یەكێكی تر دەڵێت، نازانێت مامەڵە لەگەڵ كام دەزگای ئەمنیدا بكات تا كافتریاكەی بكاتەوە چونكە دەزگاكان زۆرن، بۆیە بڕیاریداوە پابەندبێت بە كاتژمێرەكانی قەدەغەی هاتووچۆوە، ئاژانسەكە دەشڵێت كە لە یانە شەوانەكان و مەیفرۆشەكانیدا هەمان ئەو شتانە روودەدەن و پێویستە بەرتیل بدەن بە دەزگا ئەمنییەكان، ئەوەش سەرەڕای بەرتیلدان بە گروپە چەكدارییەكان بۆ پاراستنیان.
