نوێترین هەواڵ

مەسرور بارزانی: کاری لەپێشینەمان دابینکردنی مووچەیە

سەرۆکوەزیرانی هەرێمی کوردستان سەرپەرشتی کۆبوونەوەی ئەنجوومەنی باڵای ئابووری کرد و رایگەیاند، کاری لەپێشینەی حکومەت دابینکردنی مووچەی مووچەخۆرانی هەرێمی کوردستان دەبێت و بۆ ئەم مەبەستەش ”هەموو هەوڵێک دەخاتەگەڕ لەپێناو برەودان بە داهاتە گشتییەکان و کەمکردنەوەی خەرجییە ناپێویستەکان.”
 رۆژی یەکشەممە 04-07-2021 ئەنجوومەنی باڵای ئابووریی هەرێمی کوردستان بە سەرپەرشتی مەسرور بارزانی، سەرۆکوەزیرانی هەرێمی کوردستان و ئامادەبوونی قوباد تاڵەبانی، جێگری سەرۆکوەزیران کۆبووەوە، بەپێی راگەیەنراوێکی ماڵپەڕی حکومەتی هەرێمی کوردستان، لە کۆبوونەوەکەدا پەرەپێدانی دۆخی ئابووری و رێکخستنەوەی داهاتی گشتی و باشترکردنی بژێوی هاووڵاتیان تاووتوێکراوە.
لە سەرەتای کۆبوونەوەکەدا سەرۆکوەزیرانی هەرێمی کوردستان، جەختی لەوەکردووەتەوە “کاری لەپێشینەی حکومەت دابینکردنی مووچەی مووچەخۆرانی هەرێمی کوردستانە، بۆ ئەم مەبەستەش حکومەت هەموو هەوڵێک دەخاتەگەڕ لە پێناو برەودان بە داهاتە گشتییەکان و کەمکردنەوەی خەرجییە ناپێویستەکان بۆ ئەوەی بتوانێت هاوکات لەگەڵ دابینکردنی مووچەی مووچەخۆران بەردەوامیش بێت لە پێشکەشکردنی خزمەتگوزارییە گشتییەکان و ئەنجامدانی پڕۆژەکان و رەخساندنی هەلیکار بۆ خەڵکی هەرێمی کوردستان.”
لە بەشێکی کۆبوونەوەکەدا رێکخستنەوەی باج و رسوومات و میکانیزمی کۆکردنەوەی باجەکان تاووتوێکراوە و بڕیاردراوە قوباد تاڵەبانی، جێگری سەرۆکوەزیران سەرپەرشتی پرۆسەی رێکخستنەوەی باج و رسومات بکات.
لە راگەیەنراوەکەدا ئاماژە بەوە دراوە، کە ”کابینەی نۆیەم هیچ باجێکی زیادنەکردووە، بەڵکو تەنیا شێوازی کۆکردنەوەی باجەکانی رێکخستووەتەوە و ئەو باجانەی پێشتر بەپێی یاسا دانراون، کۆیان دەکاتەوە بە بێ ئەوەی کاریگەرییەکی نەرێنی لە سەر بژێوی هاووڵاتیان و بەتایبەتی چینی هەژار و مامناوەندی کۆمەڵگە و جموجۆڵ و ئاڵوگۆڕی بازرگانی هەبێت.”
لە بەشێکی دیکەی راگەیەنراوەکەدا هاتووە “جەخت لە دروستکردنی هاوسەنگی لە نێوان پاراستنی بەرهەمی خۆماڵی و دیاریکردنی نرخ و رێگریکردن لە قۆرخکاری و بەرزبوونەوەی نرخ کرا و وەزارەتە پەیوەندیدارەکان راسپێردران بۆ جێبەجێکردنی ئەو رێنماییانە بە رەچاوکردنی پاراستنی بەرژەوەندی گشتی و بەکاربەرانی هەرێمی کوردستان.”
لە کۆتایی راگەیەنراوەکەدا ئاماژە بەوە دراوە، لە پێناو کارئاسانیکردن بۆ وەبەرهێنەران و نەهێشتنی رۆتین و لە چوارچێوەی کارنامەی کابینەی نۆیەمدا “بڕیاری دابەزاندنی دەسەڵاتەکانی تایبەت بە کەرتی وەبەرهێنان و مۆڵەتدان بە پڕۆژەکانی وەبەرهێنان بۆ پارێزگاکان و ئیدارە سەربەخۆکان درا.”

هەواڵی دواتر

مستەفا کازمی هەڵوێستی خۆی لەبارەی رەتکردنەوەی پرۆژە یاسای ئاسایشی خۆراک راگەیاند

لەیەکەم هەڵویستی دژی بڕیارەکەی دادگای فیدڕاڵی بە رەتکردنەوەی پرۆژە یاسای ئاسایشی خۆراک، مستەفا کازمی سەرۆک …

وەڵامێک بنووسە

پۆستی ئەلکترۆنیکەت بڵاو ناکرێتەوە .