بەردی بناغەی گەورەترین پڕۆژەی چینی لە هەولێر دادەنرێت

لە شاری هەولێر ژمارەیەك پڕۆژەی ستراتیژی دەكەونە بواری جێبەجێكردن و بەڕێوەبەری گشتیی وەبەرهێنانی هەولێریش پێی وایە، جێبەجێكردنی ئەو پڕۆژانە كاریگەریی لەسەر هەلی كار و بووژانەوەی ئابووریی هەرێمی كوردستان دەبێت و دەشڵێت، لە چەند ڕۆژی داهاتوودا بەردی بناغەی گەورەترین پڕۆژەی چینی لە هەولێر دادەنرێت.
سامان عارەب، بەڕێوەبەری گشتیی وەبەرهێنانی هەولێر، بە ماڵپەڕی فەرمیی پارتی ڕاگەیاندوە: “ژمارەیەك پڕۆژەی ستراتیژی لە سنووری هەولێر جێبەجێ دەكرێت و بە ھەزاران هەلی كار بۆ هاووڵاتییان دەڕەخسێندرێت، یەكێك لەو پڕۆژانە پڕۆژەی (هەپی ستی)یە لە شاری هەولێر كە سێ پڕۆژەی هاوشێوەی لە ڕۆژهەڵاتی ناوەڕاست درووست كراون و یەكێك لەو پڕۆژانەش لە شاری هەولێر درووست دەكرێت.”
بەڕێوەبەری گشتیی وەبەرهێنانی هەولێر باسی لەوەشكرد: “پڕۆژەی ”هەپی ستی” دەكەوێتە گوندی ئاشۆكانی نزیك شاری هەولێر و لە چەند ڕۆژی داهاتوودا بەردی بناغەی پڕۆژەی هەپی ستی دادەنرێت، تەنیا لەو پڕۆژەیەدا هەشت هەزار هەلی كاری تێدایە و ساڵانە 14 ملیۆن گەشتیار سەردانی دەكەن.”
سامان عارەب ڕوونی كردەوە: “چەند پڕۆژەیەكی دیكەی گەشتیاری و پیشەسازی جێبەجێ دەكرێن، لەوانەش كارگەیەكی بەرهەمهێنانی ئاسن و شیش لە ناوچەی پیشەسازیی تیمار درووست دەكرێت، كە ڕێژەی بەرهەمهێنانی لە هەموو كارگەكانی عێراق زیاترە، چەند پڕۆژەیەكی دیكەش لە پلانی حكوومەتدان، ھەموو ئەو پڕۆژانە هەم هەلی كار دابین دەكەن بۆ هاووڵاتییان، هەم دەبنە هۆی بووژانەوەی ئابووری هەرێمی كوردستان”.

هەواڵی دواتر

تەندروستی عیراق بڕیاری لەناوبردنی سەگی بەرەڵا دەدات

وەزارەتی تەندروستی عیراق هۆشداریدا لەبڵاوبونەوەی نەخۆشی هاری لەناو هاووڵاتیاندا. وەزارەتی تەندروستی عیراق لەنوسراوێكدا كە ئاڕاستەی …

وەڵامێک بنووسە

پۆستی ئەلکترۆنیکەت بڵاو ناکرێتەوە .